Vita Nova a Nova Milano
Inte l'inverno del 1879, le montagne de la provìnsia de Belun, ´nte el Véneto, le zera coerte da 'na capa de neve. Inte 'na pìcola vila del comun de Sedico, ndove vivea la famèia Serafico. Giovanni Serafico, un contadin de 38 ani, fasea fronte a le dificoltà de 'na tera che oramai no gavea pì da mantégner so mòier Maria e i so tre fiòi: Pietro, Lucia e Antonio.
Le novità de tere fèrtili e oportunità ´ntel Brasile rivea spesso ´nte le pì lontan vile a l´interno del Véneto, portà da i agente de emigrassion. Sti òmini, solitamente pagà da compagnie de navigassion o da i rapresentanti del governo imperial brasilian, girava da 'na frasion a l'altra, portando promesse che scaldava el cuor straco dei pòveri contadin. Lori i ga parlà de viàie pagà, aiuto inissial e, el pì tentante de tuto, la possibilità de catar le tere che i lavorava. Par i contadin che da sècoli vivea come servi ´nte le vaste proprietà dei nòbili e dei padron, la possibilità de anca loro diventar paron le zera 'na rivolussion.
Ste promesse le ga trovà eco drento a la testa de òmini come Giovanni Serafico. La vita ´ntel Véneto la zera fata de laoro continuo, poca recompensa e nissuna parola davanti ai paron. Stufi de sempre obedir e de restar ziti, i contadini vardea ´nte l'emigrassion 'na possibilità de romper quela repetission de misèria. Ma no zera tuto sicuro. Mentre qualcuno confermava ste promesse con le lètare mandà dai parenti che i zera già partì prima, altri contava de dificoltà imaginàbil, malatie e promesse mai sostegnù. La domanda le zera sempre la stessa: "Sarà che la sorte ghe vada mèio a noialtri?"
Giovanni, no obstante, se sentiva atirà da l'idea de 'na vita nova. Le lètare de un zerman lontan, che se zera sistemà ´ntel Rio Grande do Sul, parlea de dificoltà, ma anca de progresso. "Qua semo pòveri, ma lìbari, no gavemo da divìder quel che se racòlie con el paron", disea ´na de ste lètare. Ste parole le ga restà ´nte la mente de Giovanni, contrastando con la so realtà de povertà e schiavitù.
Le condission ´nte Sedico la zera pedo ogni inverno. La tera de montagna straca no rendea pì quel che bastava par la famèia. Maria, la mòier, fasea miràcoli par sfamar Pietro, Lucia e Antonio, ma anca lei ga scominsià a sentir el peso de la penùria. Giovanni vedea ´nte i òci dei so fiòi 'na mèscola de fame e sòni ancora vivi. El savea che, se no se venturase, podaria condanar lori a 'na vita ugual o anca pedo de la soa.
La ressolussion de partir no la ze vignesta a caso. Giovanni passò noti intere a pensarghe su, valutando i rischi e le promesse. Guardava le coline bianche de neve, domandandose se un zorno le ghe avaria visto 'na cosa diversa. Quando finalmente desside, no zera par le promesse de richesse, ma par l'idea che i so fiòi podesse crèsser sensa le catene invisìbili che unia i contadin a la tera italiana.
Nota de l'Autore
Scriver Vita Nova a Nova Milano le gera come imbarcarse ´nte un viaio indrio ´nte el tempo, un marguio profundo ´nte la vita dei tanti emigranti taliani che i gavea molà tuto par sercar 'na vita pì degna e pien de speranse. Sto libro le se pì che 'na stòria; el ze 'na dèdica a la forsa, al coraio e a la fede de chi gavea atraversà l'ossean e afrontà lo sconosciuto par costruir un futuro mèio. Le stòrie che i ga impieni sto libro no el ze solo fruto de la fantasia, ma el ze inspirà da esperiense vere de tante famèie taliane che, come i Serafico, i gavea portà i so sòni drento a bauli improvisà e le so memòrie drento ai cuori. In racontar sta zornada, mi gaveo la voia de onorar lo spìrito de lota e de sacrifìssio che gavea modelà tante comunità ´nte el Brasile, spessialmente ´nte le colònie de la Serra Gaúcha.
Dr. Luiz Carlos B. Piazzetta
