Soni ´ntel Pacìfico
La stòria vera de ´na emigrante taliana a San Francisco
Lucia Bartoloni, fiola de Antonio, la ze nassù a l’Alpe de Gorreto, ’na comuneta pìcola localisà tra i vali montagnosi de la Liguria, ´ntel 1888. Da zòvena, la ze restà soltera e a lo scomìnsio del 1914, quando lei gavea 26 ani e l’Europa la scominsiava za a sentir l’ombra de la guera, lei decise de ’ndar in Mèrica. Insieme con lei i zera el fradèo Carlo, un toco pì vecio, e la cugnà Teresa Bianchini.
I tre con il treno i ze ndà fin a Genova, ndove i se ga imbarcà sul vapor Principessa Giovanna, che el partì dal porto el 10 de aprile del 1914. Inte l’intervista prima del viaio, Lucia la dise de gaver pagà da sola el so bilieto e de portar con lei sinquanta dòlari, risparmià con tanta fadiga. El destino segnà el zera San Francisco, in California, dove lori i voléa ’ndar a trovar parenti za sistemà ´ntel quartier de North Beach, che zera come un paeseto talian drento la sità.
´Ntel primo registro lei la dise de èsser dona de casa, ma quando la ze rivà a Nova York, a l’Isola de Ellis, lei se dichiarò serventa, sperando che cusì la trovasse pì fàssile laorar. La traversia no ze stà sensa tribolassion: furti tra passegieri, la paura contìnua davanti al mostro del navio, e el timor che la note con el mar grosso el ghe portasse fondo tuto.
Ai primi de maio, dopo le visitassion medeghe, Lucia e i so i ze amessi in tera mericana. A San Francisco la tacò con lavoreti a casa: cusidura, ratopi. Pì tarde lei trovò posto in ´na fàbrica de vestì e scarpe. Ma zera vita dura: zornade lunghe, ària pesà, pòlvere che te se infilàva ´ntei polmoni, paga bassa e gnente protession contro le malatie.
Li la salute de Lucia scominsiò a complicar. I mèdiche i ghe ga dito che zera la tuberculose, la ze sta messa in ospedal, ma sùbito l´autorità del governo ghe dise che lei doveva tornar indrio, perché cusì volea la lege de l’emigrassion mericana.
Rivà ancora a l’Alpe de Gorreto, la la ze stà curà, ma la infermità la corse pì ràpido de la vita. ´Ntel 1922, a 34 ani, Lucia la ze morta, menando via con lei i soni che l’avea portà oltre l’Atlántico.
El fradèo Carlo e la cugnà Teresa i ga restà in Califòrnia, ma lori i ga lassà la sità e i se ga spostà in campagna, ndove i comprò tera e i ga fùndà un rancho. Là i piantò radisi par sempre, sensa mai pì rivar in Itàlia.
La vita curta de Lucia Bartoloni la ze l’imàgine de miàia de emigranti taliani: coraio de lassar la tera nativa, speransa davanti al scognossù, sacrifìssi dal laoro e ´na lota contìnua contro el tempo e contro el destin che ga segnà tante generassion.
Nota del Autor
Sta stòria la ze fata sora fati veri, tirà fora da registri de emigrazssion e da memòria conservà dai dissendenti. Par tegner riservà i fameiar e par proteser le fonti, i nomi e i cognomi i ze sta cambià.
La ze un omaio a tuti quei emigranti taliani che, con coraio e sacrifìssio, i ga traversà osseani in serca de un doman mèio, lassando come eredità ’na stòria de fadiga, speransa e resistensa.
Dr. Piazzetta
