Le Barche de la Morte che i ga Portà i Emigranti Italiani in Mèrica
La traversada de l'Atlántico la zera fata in condission molto precàrie, su vècie imbarcassion de pì de vent'ani de uso, sempre piene de merce. Lore le zera vere carete del mar. Inte l'inìssio de la granda emigrassion, prima del 1866, lori ancora usava anca barche a vela. Quando la grande corsa par l'Amèrica la ga partì, la maior parte de le barche la zera a vapor, destinà a trasportar merce. Sti vapori lori i zera sistemà a la svelta par poderghe meter drento dei catri, par far dormì la zente sensa gnanca un mìnimo de privacidade. Le compagnie de navigassion italiane lore no podea perder tempo par far quatrini su sto novo filon de emigranti, ove i poari italiani i zera massa tanti e senza difese. El guadagno la zera grando, ma sul peso de la soferensa de sti poareti, sensa curarse del conforto, de l’igiene e de la manutenssion mìnima de ste barche.
Sti vapori lori i partiva stracarghi de emigranti, con tanta pì gente de quel che podessero pròprio star. Ste modifiche de fortuna, fate in freta a volta ´ntel pròprio porto, lori le zera poco pì che catri messe là in fondo de quei buchi par far i migrante dormì, e no i ghe dava gnanca un fià de privacidade. No ghe zera bagni boni e l’aria drento quei grandi saloni sensa ventilassion, fètidi e sufocanti, e spesso la causava problemi de respirassion durante la longa traversada. I emigranti i dovea anca conviver con tanti animali vivi, incagiolài, che vegnia scannài e masselà pian pian su la coperta davanti a tuti durante el viàio.
L’igiene a bordo la zera pròprio carente, parché i poareti dovea far i so bisogni ´ntei sechi, che po’ vegniva svodài in mar. Sto fato causava epidemie, che i amasava tanti de sti emigranti, de sòlito i pì dèboli, vèci e fiòi. Par el oror de la so zente, i corpi lori i vegniva butài in mar, avoltài con un linsiolo. Sto episòdio el resta scolpì drento la memòria de i nostri avi, e ancora, dopo tanti ani, adesso i so descendenti lo recorda come el momento pì significativo de tuti quei viàio.
La zera frequente ocasion che el magnar mancava par tuti, causando desnutrission e debolessa, e aumentava el risco de malatie. Na massa de persone de diverse età, streti e chiusi in spassi con poca ària, magnando mal, e con una igiene pèssima, sensa bagni boni e sensa possibilità de lavar, le zera vere tràpole galegianti pronte par far amalar i pì dèboli.
Quando finalmente le barche rivava in porto, spesso parte de la 'carga' la ze rivà pròprio malada o, purtropo, sensa vita.
Qualche dato, presente ´ntei registri del museo de l’emigrassion italiana, el ghe pol dar una idea de quel oror che i nostri noni e bisnoni i ga visto su quele barche. I dati qua spiegano ben el motivo de la denominassion de “barche de la morte” che le ga ciapà.
Nel ano 1905 sul barco “Città di Torino” ghe zera 45 morti su un totale de 600 passegieri. Sul barco “Matteo Brazzo”, nel 1884, 20 morti de còlera su 1.333 passegieri. Sto grande vapor, con la epidemia de còlera a bordo, el zera stà respinto con i canoni a Montevideo par paura del contàgio. Imaginate la scena, con centinaia de persone amassài, sensa bagni boni, ndove i dovea usare con el mìnimo di privacidade un sècio de legno par i so bisogni, e ndove scopiava un’epidemia de còlera! El còlera el se trasmete facilmente per la mancansa de igiene, e imaginè la scena quando centinaia de persone i ghe venia tuti de la diarea feroce, rossa de sangue, e con i vómiti, tuto sensa latrine! Na scena de oror.
Nel barco “Cachar”, nel 1888, ghe zera 34 morti par fame e sofocamento. El “Frisia” nel 1889, el ga visto 27 morti par sofocamento e pì de 300 maladi. Sul “Pará” nel 1889, i ghe ga trovà 38 casi de morbilo. El barco “Remo”, nel 1893, el ga visto 96 morti par còlera e difteria. L’“Andrea Doria” nel 1894 el ga visto 159 morti su un totale de 1.317 passegieri. Sul “Vicenzo Florio” sempre nel 1894, ghe zera altri 20 morti.
No sempre el problema de la morte la zera dovuto a l'igiene scarsa. Tante volte, forse par el uso longo e la manutenssion scarsa de le barche, el causava tanti naufragi, che i ga portà via migliaia de emigranti che i soniava na vita pì bona.
I raconti de tanti naufragi durante el gran ésodo italiano i ghe pode far capir quel che sucedeva su quei vècie barche de le compagnie italiane. Nel 1891, soto le coste de Libia, davanti a Gibraltar, el barco “Utopia” el ga portà a fondo 576 passegieri, tuti emigranti dal sud d´Itàlia. El stesso el ga fato el “Bourgogne” nel 1898, a Nova Scotia, dove i ga perso la vita 549 emigranti, tanti italiani.
El naufràgio del barco “Sirio”, el ze uno dei pì ricordài dai discendenti italiani in Brasil, forse par la triste canson dedicada a sto naufràgio, cantada ancora incòi dai cori popolari in Itàlia e in Brasil. El se destrusse soto le coste de Spagna nel 1906, causando la morte de 550 emigranti. Tra i morti ghe gera anca el vescovo de San Paolo.
Un altro naufràgio molto ricordà el ze quel del vapor “Principessa Mafalda”, che ormai el zera famoso come el pì grande barco de passegieri de la flota mercante italiana. Con pì de vent’ani e sensa manutenssion recente, el se destrusse nel 1927 soto le coste brasiliane, tra Bahia e Rio de Janeiro, quando el fasea el so ùltimo viàio transoceànico prima de esser demolì. Oficialmente ghe zera 600 morti, su un totale de 1.259 passegieri, in gran parte emigranti dal Piemonte, Liguria e Veneto. Con el regime fascista, al’inìssio i ga provà a dir che ghe zera "solo" 300 morti, ma dopo i ga confirmà che i zera 600, con un total reale de 658 morti. Un vero masselo.
