San Marco Evangelista e Venèssia

 

San Marco Evangelista e Venèssia

Zudio de na famèia rica, nassùo ´ntel sècolo I, probabilmente in Palestina. Lu el ze stà missionàrio in Oriente e a Roma, ndove gavaria scrito l'Evangelo. Nel ano 66, da la prison, San Piero scrivendo a Timòteo ne dà le ùltime informassion su Marco, che morì probabilmente nel ano 68, a Alessandria, Egito. I so resti i zera inte na cesa de sta sità che i àrabi gavea brusà nel ano 644 e dopo i Patriarchi de Alessandria i gà fato rivarla fin al 689. La lesenda la conta che nel ano 828, in sto posto, i ze rivà do mercanti venessiani, Buono da Malamoco e Rustego da Torcello, che i se gà portà via i resti de el Evangelista e i ghe li gà portà a Venèssia, ndove lori i ze rivà el 31 de Zenaro 828. I resti de Marco i ze stai ricevù con grande onor dal Dose Giustiniano Partecipazio, che lu zera fiòl de Agnello e sucessor del primo dose de le ìsole de Rialto. Nel ano 832 el Dose Zuan, fradel e sucessor de Giustiniano, el gà fato finir la costrussion de na basìlica par ricever definitivamente i resti del santo, la qual che dopo la ze stà ciamada Basìlica de San Marco. Al´inisio la spléndida costrussion de marmo, piena de oro e piere preziose da tuto l'Oriente, la gà avudo qualche contratiempo, quando la gà patì un fogo nel ano 976, provocà da na rivolta popular contro el Dose Candiano IV, che el se gavea refugià con so fiòl drento la basìlica. In quel’ocasione, i ribeli i gà distruto e brusà anca el vissino Palasso Ducale, che el zera la morada e sede del goerno de la Serenìssima Repùblica de Venéssia. Nel ano 976-978, con i so schei, el Dose Piero Orseolo I la gà restaurà sia la Basìlica che el Palasso Ducale. Dopo, nel ano 1063, su ordine del Dose Doménego Contarini I, i gà fato partir na nova restaurassion de la Basìlica, che la ze stà completà dal so sucessor, el Dose Doménego Selvo (1071-1084). Nel ano 1071, San Marco el ze stà siolto par ésser el titolare de la basìlica e paron de la Serenìssima Repùblica de Venèssia, al posto de San Todaro, che fin al secolo XI el zera el santo protetor de Venéssia. La Basìlica la ze stà consacrada solenemente el 25 de Avril del ano 1094 durante el governo del Dose Vitale Falier. In quel’ocasion, dopo la messa selebrà dal vescovo, quando lui i ga rompesto qualcossa de piastre de marmo da na colona e i ga catà na cassa con le relìquie. Da quel momento, la Repùblica de Venèssia la ze restà inseparabilmente ligada al so paron, e el so famoso sìmboło, el Leon Alado, el ze diventà parte del stendaro de la Serenìssima Repùblica de Venèssia, con le parole scrite su el libro: “Pax tibi Marce, evangelista meus”.

La Colònia Santa Felicità a Curitiba - Imigrassion Taliana nel Paranà

 

La Colònia Santa Felicità a Curitiba - Imigrassion Taliana nel Paranà

Santa Felicità la ze incuò un quartier de la sità de Curitiba, ntel Stato del Paranà, situà sul vècio camin dei tropèri paulisti che i ze ndava zo verso el sud del Brasil. Adeso, l’aministrassion de la region de Santa Felicità la copre i quartieri: Butiatuvinha, Campina do Siqueira, Campo Comprido, Cascatinha, Jardim Gabineto, Lamenha Picenina, Mossunguê, Orleans, Santa Felicità, Santo Inácio, São Braz, São João, Seminário e Vista Alegre.

Tuta sta grande zona la faséa parte de la vècia Colònia Santa Felicità, formà da i imigranti taliani. L'ocupassion de 'sta zona la ze stà pì forte da 'l 1878, con l'arivo de imigranti, la maior parte di lori i ze vegniù dal Vèneto e dal Trento, ntel nord de l'Itàlia.

I colòni al´inìsio i se dedicava a far formài, vin, piantassion de orti e lavori de man. Più in là, con l'ani, specialmente tra i ani 1950 e 1960, i se gà consolidà e i so discendenti i gà scomenssià a portar i prodoti agrìcoli a Curitiba. De bonora, la matina, se forméa na gran fila de carete a quatro rote, tiràe da un o do cavai, con na coperta su la parte davante par proteger el condutor dal sole. Lore i ´ndava adàsio, una drio l’altra, verso la capital del Stato. Quando lore i ze rivà, i se spartia per la sità, e ogni prodotor el gavea i so clienti. De pomerìgio, le stesse carete le tornava indrio, adàsio, sempre in fila, verso le so case in Santa Felicità. Sti careti i zera de solito condussèi da le done, tante volte anca done vècie, che le fasea sto lavor con dedission e sempre con un bon umor. Lori le portava la roba de i orti, frute e verdura, a venderla a Curitiba.

Cusì, in sta fase pì 'vanzà de l'imigrassion, la maior parte de le famèie dei discendenti dei pionieri le vivea de 'sta atività. In tel stèsso perìodo, pian pianin, Santa Felicità la gà trovà la so vera vocassion: la ze diventà un quartier gastronómico de Curitiba, con tanti ristoranti che servìa magnar tìpico talian. L'artigianà, l'indùstria e el comèrssio lori i ga completà sto cìrcolo, trasformando la vècia colònia in un quartier rico de Curitiba.

El nome Santa Felicità el vien da la vècia parona dei tereni, Dona Felicità Borges, che lei la fasea parte de na famèia de origine portoghesa. Lei e i so do fradèi, Antonio e Arlindo Borges, i gà vendè i loti ai prime quìndese famèie de imigranti che se stabili là.

Secondo i raconti de i pionieri, scriti ntel 1908 dal prete Giuseppe Martini, la Colònia de Santa Felicità la ze stà fondà in novembre del 1878 da quìndese famèie de imigranti taliani scampài da la Colònia Nova Itàlia.

Sto grupo de imigranti, de origine vèneta, el ze rivà al Porto de Paranaguà in zenaro del 1878, e el ze stà fissài dal goerno provinssiale lungo el litoral paranaense – pì preciso a Porto de Cima e São João da Graciosa, nùclei de la colònia ciamà Nova Itàlia.

Malcontenti del clima tropicale, de la mala qualità dei tereni visini al riva de el mar, e per mancansa de prospetive de vender i so prodòti, i imigranti lori i gà scomenssià a interessarse ai raconti de i tropèri che i girava tra la region e el pianalto de Curitiba. Lori i ghe parlava de Curitiba, de el so clima pì fredo e de le tère bone che ghe stava 'ntorno, e de altri imigranti che i zera zà là.

Nel stesso ano, ntel 1878, qualcossa de 'ste famèie le gà fato sù la Serra do Mar fin a Curitiba, e le ga domandà al goerno del Paranà de poder trasferirse sù el pianalto. Tante de 'ste famèie le ze stà fissà ´ntle colònie taliane zà esistenti vissini a Curitiba, come quele de Alfredo Chaves, Presidente Faria e Maria José.

Quèi che gavea qualche risparmi i gà decidìo de comprarse tereni privadi. Con tute le risorse messe insieme, le quìndese famèie le gà comprà el gran teren da i fradèi Antonio, Arlindo e Felicità Borges. I vèci racònti i dis che, quando i fradèi Borges lori i gà vendù el tereno ai taliani, lori i avè chiesto che el nùcleo colonial el ghe avesse a vegnir ciamà Felicità, in onor de la so sorèa. Sto fato el vien confermà anca da i raconti del prete Maximiliano Sanavio, pàroco locale: "i taliani, che i zera catòlici, lori i gà meter la parola santa al nome, e cusì la colònia la ze diventà Santa Felicità. El tereno comprà da i taliani in Santa Felicità el ze stà spartì in quìndese loti de do alquèri, segnà un fianco de l'altro da una strada principal, e spartìi per sortegio trà le famèie.

Dr. Luiz Carlos B. Piazzetta

Erechim RS