Padre Colbachini in Paranà
Nei ani finali del sècolo XIX, co l'emigrassion definitiva fora de l'Itàlia, tanti setori de la cesa la ga scominssià a preocuparse de ‘sto novo fenómeno. Fino a quel momento, l'Itàlia, specialmente ne le provìnsie pì setentrionài, conosséa un altro tipo de emigrassion che seguiva le stagioni de le messure e de le racolte. La se ciama emigrassion stagionàl, dove chi quasi sempre emigrava fasea el paròn de casa e i fiòi òmeni pì grandi. I stava fora par qualche mese e dopo i tornava sempre a cà. Se pol sitar anca quei che gavea mestieri e girava continuamente par vàrie sità de tanti paesi par el so laoro: careghete, stagnini, marangoni, vendidóri ambulanti, cantanti, musicanti e altri artisani. Con le dificultà che vegniva sempre pì grando, l'é rivà anca el momento par le done de dar la so parte de contributo nel fenòmeno migratòrio verso i paesi vissini, specialmente nel impero austro-ungàrico, in Francia e anca presso le famèie nòbili sparse par tuta l'Itàlia. Le tose partiva par laorar come serve, e quèle che zera mame ´ndava a far le bale, cioè balie. ‘Ste done, de sòlito, rivava da le montagne de Belun, tanto sercàe par la so bona salute e par la quantità e qualità de late che le zera bone de dar. Naturalmente, le lasciava i so fiòi naturài a cà, ndove che qualcun de la famèia che restava se ocupava de lori, alattandoli con el late de un'altra dona da casa o de muca, mescolà con la acqua.
Piero Colbachini el ze nato a Bassan del Grapa, provìnsia de Vicensa, nel Vèneto, el 12 de setenbre del 1845. El ze entrà in te l'Òrdine dei Gesuìti, ma, par motivi de salute, no l'é rivà a far i voti perpetui, restando cusì come novisso. El ze stà ordinà prete qualche tempo dopo, nel 1869. Quando che zera ancora in Itàlia, el ga provà a radunar missionàri par laorar in Amèrica junto ai emigrà, ma, sfortunatamente, no l’é rivà. Tocà dai tanti implori dei so coetani par l'assistensa spirituale, nel 1884 el ga ciapà l'autorisassion da la Sagra Congregassion de Propaganda de la Fede par andar in Amèrica come missionàrio apostòlico. In realtà, el Padre Colbachini gavea el desidèrio de crear na entità par dar assistensa ai emigrà, e quando che el ga sentì parlar de l'inissiativa de Monsignor Scalabrini, el ga sùito domandà de far parte. El ze partì spontaneamente sùito dopo par el Brasile, più precisamente par el stato del Paranà, seguendo le orme dei imigranti. In poco tempo nte la nova tera, el ga fondà quasi 'na ventina de capele e 'na grande cesa ne la Colònia Santa Felicità, ´nte i dintorni de la capitale paranaense.
In Paranà, dopo el falimento de far colònie ´ntel litorale, el governo de la provìnssia l'é vegnù a investir ne i asentamenti pi vissini a la capitale, che gavea condission pi favorevòli par el svilupo economico de i imigranti, che i zera par la maior parte contadini.
Pròprio in 'ste nove colònie, qualcuna lontana anca pì de 50 chilometri, che el Padre Colbachini gavea fato la so operassion, e dopo diversi ani e pì de 30 capele e cese create, malà e sentindose dèbole par andar vanti, el ga domandà de tornar in Itàlia, ndove che el ze morto a l'età de 55 ani.
