La Saga de Francesco e Mariana ´ntela
Colónia Silveira Martins
Zera el scomìnsio del ano 1877 quando el vapor Maranhão, pien de sòni e speranse, el taiava le aque del sud del Brasile. Transportando sentinaio de emigranti italiani, el navio gavea zà passà el sboco del fiume Guaíba e el se ga vissinà al porto de Rio Grande. Su le mura del vapor, i passegieri i se schisava par vardar la costa che la prometea 'n futuro novo. Fra de lori, Francesco e Mariana, 'na zòvane maridà de San Giorgio, ´ntel comune de San Polo di Piave, provìnsia de Treviso, i condividea sguardi de speransa e aprenssion. Mariana, con la man su la pansa che la costodiva el toso ancor non el ga nassesto, la se sforsava de tegner l’emossion. Maridà da solo quatro mesi prima, ´nte la cesa de San Giorgio Maggiore, le memòrie de la serimónia semplice, ma pien de significà, le zera ancora vive ´ntele so teste. El sbarco el zera 'n caos, pien de essitassion. El grupo de quei que ze rivà el zera portà in 'n alogio improvisà sui contorni del porto. I baracon de legno grosolano, coperti de foie de zinco, i dava poco conforto e ancor meno privassità. Òmeni, done e putèi, i ze vegnesti da tante provìnsie de l’Itàlia, i se sforsava de tegner la dignità tra el pian de tera dura e la mancansa de divisòri. Francesco, con la so postura robusta e riservà, el dava man a Mariana par sistemarse intanto che el vardava con disconfiansa l’ambiente che, anca se precàrio, el zera mèio de le caneve del Maranhão. I zorni ´nte i alogi i zera longhi, in atesa de le òrdine de le autorità par continuar el viaio. L’atessa la zera pesante, e le notìssie dei ritardi dovù a le piove le aumentava l’inquietudine fra i migranti. Se alsava ogni tanto de le discussion calde, ma i capi del grupo i le spegneva presto, esortando la pasiensa. Francesco, malgrado l’ánsia, el restava calmo par sostegner Mariana, che la ga scominsià a sentir i primi fastidi de la gravidessa. Quando i ze rivà l’ordine tanto aspetà, la contentessa ´nte l’alogiamento la se poteva quasi tocar. Francesco e Mariana lori i ze imbarcà su el vapor Guimarães insieme a ´na trentina di compagni, lassando drio el tumulto del porto e navigando su le aque de la Lagoa dos Patos. El viao fluvial el gavea portà 'n momento de pace. I paesaggi verdi dele rive e el brusio de l’aqua i gavea momenti de contemplassion e speransa. Quando i ze rivà a la sità de Rio Pardo, però, la realtà la ze tornà pesante. El transporto con careti a muli e la màrcia a piè su per la Serra de São Martinho la zera sfibrante. Mariana, anca straca, la mostrava 'na forsa incredìbile, mentre Francesco el gavea cura de i pochi ogeti del casal e el la sostegneva. La rivada a Val de Buia, ´nte la Colônia Silveira Martins, la ze stà 'na tapa importante, ma no gavea portà el solievo sperà. La tera promessa gera ancora pien de sfide. I loti no i zera segnà, e i emigranti i gavea da improvisar ripari mentre i spetava la definission de le tere. I mesi i zera pien de dificoltà sempre pì dure, testando coraio e la resiliensa de ogni famèia. 'Na epidemia de tifo la ze scopià con forsa devastante, spandendose presto ´ntei alogi e ´ntei campamenti lungo le strete strade. L’umidità e la mancansa de igiene le gavea rendesto el posto fèrtile par la malatia, che la portava via vite ogni dì. Pì de 300 emigranti i gavea perso la batàlia contro el tifo, ridusendo el grupo de 1.600 persone a 'na scena de dolor e disperassion. Francesco e Mariana, consapevoli dei rischi, i afrontava la minàssia con determinassion. Mariana, ormai visibilmente inssinta, la zera proteta con tuto el possìbile da Francesco, che el laorava sensa fermarse par garantire a ela sibo e riposo, no obstante le dificoltà. El gavea improvisà 'n riparo pi ventilà, lontan da le zone con pì malati, e el se dava da far par bolir l’aqua che beveva, anca se questo voleva dir consumar quela poca legna seca disponìbile. I do zòvane i ga trovà conforto ´nte la solidarietà del grupo de emigranti, che, anca in meso a la tragèdia, i se sosteniva un con l’altro. Le famèie i dividea quel poco che gavea, i curava i malati e i sepeliva i morti con dignità. Ogni gesto de aiuto, anca el pì pìcolo, el dava forsa par sperar zorni miliori. La comunità, anca se dèbole, la mostrava 'na forsa nata dal condivìder del sufrimiento e de la speransa de un futuro construito insieme. Par Francesco e Mariana, ogni dì superà el zera 'na vitòria, no solo contro la malatia, ma anca contro el sconforto che minassiava de rubar la forsa del cuor. Malgrado la devastassion atorno, lori i se rifiutava de molar, tegnendo fede che el so toso el saria nassesto in 'na tera ndove le dificoltà de incòi le sarìa cambià par le promesse de doman. Quando finalmente lori i ga ricevesto el so lote de tera, Francesco e Mariana ga sentì na mescola de alìvio e responsabilità pesar sora i so ombri. La tera, un toco de bosco denso e selvàdego, pareva tanto ostil quanto promissor. Le àlberi alte blocava la luse del sol, e el tereno iregolar, coerto de radise, gavea da èsser domà prima che qualchesìa semen possa germinar. E anca così, par la copa, quel peseto de tera rapresentava el prinsìpio de un sónio che i gavea sustenù par tuto el calvàrio del so viaio. Con strumenti sémplici e na forsa de volontà granda, i ga scominsià el laoro monumental de trasformar el bosco vèrgine in na casa. Francesco tegnia ben saldo el manaron, ogni colpo che rissuonava ´ntel cuor de la foresta, mentre Mariana, benché in stato de gravidessa, racolieva i rami e netava el tereno con movimenti delicà. El laoor el zera stracante e pareva che no finìsse mai, ma ogni àlbore taià e ogni solco fato ´na conquista che anunciava el prinsìpio de ´na vita nova. La comunità taliana ´nte la Colonia Silveira Martins la zera indafarà. I vessin sparsi sui loti, formea ´na rete de aiuto indispensàbile. Zera comune che i grupi se trovasse par aiutarse ´ntei laor pì dure, come costruir case o preparar le radure. La resiliensa e el spìrito de colaborassion dei migranti gavea scominsià a portar i sui fruti. Picole piantassion scominciava a aparìr chi e là, le prime bèstie le zera zà alevà, e la vita, benché dura, gavea un ritmo de speransa. Par Francesco e Mariana, l'isolamento el zera un nemico silensioso. La nostalgia de l'Itàlia, dei paesagi fameiari e dei cari che lori i gavea làssà indrio, sovente vegniva fora ´ntei discorsi de la sera, a la luse tremolante de na candea. Ma ogni matina la portava la promessa de un doman megliore. Pian pianin, la tera la ga diventà pì de un peseto de bosco. Zera el teatro de ´na stòria de superassion e perseveransa. Ogni zorno che passava, Francesco e Mariana piantava no solo semense ´nte la tera, ma anca le radise de ´na vita nova, ndove i fruti saria racolti da generassion che ancora gavea da vegnir.
Nota del Autor
Sta òpera la ze un omenaio ai emigranti italiani che, a la fin del sècolo XIX, ga traversà el Atlàntico in serca de nove oportunità ´nte le tere del Brasile. Inspirà su fati stòrici, el raconto de Francesco e Mariana reflete la traietòria de mile de famèie che ga afrontà l'inconossiù, mosse da sóni de prosperità e na determinassion indomàbile. I eventi qua scritti, da la traverssia durìsima sul vapor Maranhão fin a la lota par la sopravivensa ´nte la Serra de São Martinho, evidénsia no solo la forsa e el sacrifìssio de sti pionieri, ma anca i alti custi umani de sta aventura. Ntei fati pì tràgiche e impatanti de sto periodo el ze stà l'epidemia de tifo che la ga devastà la Colonia Silveira Martins tra magio e zugno del 1877, siapando la vita de pì de 300 emigranti italiani, su un total inisial de sirca 1.600 persone. Sta pèrdita devastante la ze un ricordo de la resiliensa de le comunità che, anca davanti a tanta pena, i ga ricostruì le so vite, onorando chi che lel ze partì. El lassà de sti emigranti va oltre le dificultà afrontà—el ze tessù ´ntei valori trasmessi a le generassion sussessive e ´nte la rica contribussion culturae che ga lassà su sta tera brasilian. Che sta òpera fitìssia, ma basà su fati stòrici contà dai pionieri stessi e documentà lungo la stòria, ispire na riflession su la bravura de sti òmeni e done e che rinforse l'importansa de preservar le so stòrie, no solo come memòria, ma come pilastri de identità e umanità.
Con rispeto e amirassion,
Dr. Piazzetta
