Pederobba ´ntel Véneto – Stòria, Emigrassion Italiana e l´ Antica Nobiltà dei Conti d’Onigo
Introdussion
Situà ´ntela provìnssia de Treviso, ´ntela region del Véneto, ´ntel nord-est de l’Itàlia, el comune de Pederobba el ze sta tra la pianura del fiume Piave e le prime alture de le Alpi che mena verso el massisso del Monte Grappa.
Sta zona, che fa parte de la stòrica Marca Trevigiana, la ze stada sempre un teritòrio de passàgio tra le pianure agrìcole del Véneto e le region montagnose de le pre-Alpi. Con el passar dei sècoli, la pìcola comunità de Pederobba la ga varda grandi cambiamenti polìtici, sossiai e económici, tra cui el domìnio de la Repùblica de Venéssia, el perìodo austrìaco e la granda emigrassion italiana verso l’Amèrica.
Incoi, anca se el ze un comune pìcolo, Pederobba el ga na stòria rica che liga vècie famèie nòbili, come i Conti d’Onigo, a le stòrie de miaia de emigranti che i ga partì par paesi come el Brasil, l’Argentina e i Stati Unìti.
Le origin stòriche de Pederobba
La presensa de zente ´ntela region de Pederobba la torna indrio fin da l’Antiguità. Prima de la conquista romana, sto teritòrio el zera abità dai Paleoveneti, un pópolo antigo che ocupava grande parte del atual Vèneto.
Durante el perìodo romano, la region la ze diventà parte de rote comerssiai importanti che ligava el nord de la penìsola italiana con le region alpine e l’Europa Central. La visinansa del Piave la favoria el trasporto de le mercansie e el movimento de viaiadori.
´Ntela Età Medieval, el teritòrio el ga passà a far parte de la ciamà Marca Trevigiana, ´na region disputà tra signori feudai, vescovi e comuni urbani.
Documenti del sècolo XII i parla za de ´na comunità parochial antica ciamà Plebem de Petrarubea, considerà ´na de le prime referense stòriche de la località.
Pederobba soto la Repùblica de Venéssia
Tra i sècoli XIV e XVIII, Pederobba la ga fato parte dei teritori de la potente Serenìssima Repùblica de Venéssia, che governava vaste region del nord-est italiano.
Durante sto periodo, la region la zera parte del Quartier del Piave, che dipendeva amministrativamente dela sità de Treviso.
El fiume Piave el gavea un papel importante ´ntela economia locale. Par le so aque vegniva trasportà grandi quantità de legname che rivava de le foreste alpine e che zera destinà a le construssion navali e a le òpere pùbliche de Venéssia.
De pi, sto teritòrio el ga diventà un ponto de incontro comerssial tra contadin de la pianura e comunità de le region de montagna.
La nàssita del comune moderno
El comune moderno de Pederobba el ze stà istituì ´ntel 1810 par decreto del imperador francese Napoleon Bonaparte, durante la reorganisassion aministrativa de la Italia soto domìnio napoleónico.
Dopo la sconfita de Napoleon e la restaurassion del orden europeo, el teritòrio el ze tornà soto el controlo de la Casa d’Asburgo, entrando a far parte del Impero Austrìaco.
Solo ´ntel 1866, dopo la Tersa Guera de Indipendensa Italiana, el Véneto el ze vignesto anesso al Regno d’Itàlia.
Economia rural e povertà ´ntel sècolo XIX
Verso la fin del sècolo XIX, Pederobba la zera ´na comunità quasi tuta rurale.
L’economia la se basava sora la pìcola agricoltura familiare, con coltivassion de formenton, frumento e altri prodoti par la sussistensa. La polenta, fata con farina de formenton, la zera el magnar de ogni zorno de la popolassion contadina.
Però la scarsità de tera coltivabile e la crèssita de la popolassion rendea difìssil la vita de le famèie.
Par sta rason tanti abitanti i ga tacà a sercar laoro fora de la so region.
La tradission de la migrassion staional
Par sècoli, i abitanti de Pederobba i ga praticà la migrassion stagional, che ´ntel dialeto véneto la zera ciamà far la staion.
In sta pràtica, i òmeni i partiva par qualche mese del ano in serca de laoro in region visin o anca in teritori del Impero Austrìaco, che in quel tempo comprendea vaste zone de la Europa Central.
Tra i laoradori migranti i zera comun i badilanti e i carriolanti.
Sta zente la viaava spesso a piè par lunghe distanse, portando con lori i ferri de laoro, ´na cariola, qualche chilo de farina de formenton par far la polenta e qualche toco de formàio.
Dopo mesi de fadiga in cantieri, strade o campagne, lori i tornava a la so tera con pochi risparmi.
La granda emigrassion italiana
Da la dècada del 1870 in vanti, sta migrassion temporánea la ga scominsià a trasformarse in emigrassion definitiva.
La crisi agrìcola, la crèssita de la popolassion e la mancansa de tera la ga portà miaia de famèie vénete a sercar nove oportunità fora de la Europa.
Tra le mete prinssipai ghe zera:
Brasil
Argentina
Uruguai
Stati Uniti
Dopo el 1875, el Brasil el ga diventà ´na de le mete pì importanti par sta corente migratòria.
Lora desso partia famèie intere, portando pochi beni e tanta speransa de rifar la vita in tere lontan.
Par tanti contadin véneti, el Brasil el zera la famosa “tera de la cucagna”, sìmbolo de abondansa e fortuna.
Pederobba e la Prima Guera Mondial
La posission de Pederobba, visin al Monte Grappa e al Piave, la ga fato sì che la region la diventasse zona stratègica durante la Prima Guera Mondial.
Dopo la sconfita italiana a Caporetto ´ntel 1917, el Piave el se ga diventà la prinssipal lìnea defensiva del esèrssito italiano.
Diversi combatimenti i se ga sussedesto ´ntei dintorni de Pederobba, causando distrussion e spostamenti de la popolassion.
Un dei monumenti pì importanti de sta memòria stòrica el ze el Sacràrio Francese de Pederobba, inaugurà ´ntel 1937 par onorar i soldai francesi morti ´ntei combatimenti de la region del Monte Tomba.
I Conti d’Onigo: l´antica aristocrasia locale
Tra le famèie che ga avù grande influensa ´ntela stòria de Pederobba se distingue l´antiga casa aristocràtica dei Onigo.
La famèia la ga origini medievai e probabilmente la deriva da lignagi germánici o lombardi che se stabilì ´ntela region durante el perìodo del Sacro Impero Romano-Germánico.
In prinssìpio la lìnea la zera conossuda come da Cavaso, ma dopo aver comprà i casteli de Onigo e Rovigo verso la fin del sècolo XII, la famèia la tacò a doparar el soranome Onigo.
Nota storiogràfega del autor
Sto testo el ga come scopo presentar ´na sìntesi stòrica del comun de Pederobba e del so contesto sossial tra i sècoli XVIII e XX, con atenssion particular al fenómeno de la emigrassion véneta e a la presensa de la antica aristocrassia locale rapresentada da la famèia Onigo.
La stòria de le pìcole comunità del Véneto, come Pederobba, la ga aiutà a capir meio le trasformassion che ga segnà el nord de la Itàlia tra el declino de la Repùblica de Venéssia, la dominassion de la Casa d’Asburgo e la formassion del moderno Stato italiano ´ntel sècolo XIX.
Ste trasformassion le zera ligà al grande movimento migratòrio che ga portà milioni de italiani a traversar oceani in srca de nove oportunità. In sto contesto tante famèie de la region le ga partì verso el Brasil, l’Argentina, i Stati Unìti e altri paesi del ciamà Novo Mondo.
Par l’autor, lo studio de sta pìcola comunità vèneta el ga anca un significà particolar, parchè le so origini familiari le ze ligà pròprio al teritòrio de Pederobba. Sto fato el dà a sta ricerca stòrica un valor in pì de memòria e identità.
Cusì sto lavoro el cerca de conservar la memòria de le stòrie umane de chi che partì da ste tere lungo le rive del Piave, portando con lori tradission, léngua e cultura.
La memòria de ste comunità la resta viva incoi tra i discendenti dei emigranti sparsi par l’America e l’Oceania, par i quali le antighe tere del Véneto le resta un importante ponto de origine cultural e stòrica.
Dr. Luiz Carlos B. Piazzetta
