La Longa Spera dei Emigranti Vèneti al Porto de Zénoa
Pena arivà al Porto de Zénoa, quase senpre, lori i dovea spetar par qualchi zorno, a volte anca par setimane, prima de ciapar el vapor che li portaria a la sospirada tera de la "cucagna", l'America promesesta. ‘Na spianada davanti a la stassion dei treni de Zénoa, la zera de solito invadesta da sentina de nove emigranti, rivà da ogni region de l'Itàlia, che i se scomenssiava a stipar, tute lori i aspetea l’imbarco al porto. Durante ‘sta spetativa, i emigranti i se catava descurài e soto a ogni manèra de privassion, vedendo a volte quei pochi schei che i gavea metù da parte ndar persi, rapinati da na comitiva granda de speculatori, ladri e zente che sfrutava. I furti de passaporti, schei e carega i zera continuài. El presio dei vìvari e dei alberghetti su ‘l porto i zera gonfià ad arte, dai negosianti sensa scrupoli, che i vedeva ne ‘sti povareti na scussa par far schei su e guadagnar. Lori i zera d’acordo con le agensie de viàio e con le compagnie de navi. Quelo che sucedea là zera na vergogna, e pròprio orrendo. Ne le so testimonie, i primi emigranti i ze contà che lori i vegniva lassà rovinà dai stessi italiani, prima ancora de lassàr l’Itàlia. El paroco Maldoti, mandà dal Monsignore Scalabrini, el gà fato tanto par proteger e socorer ‘sti pòvari emigranti che rivava là, magari una setimana prima del imbarco, lassài a la so fortuna. Diversi dai taliani del sud, che partiva col borsèl svotà, i emigranti vèneti i partiva senpre co na pìcola economia, fruto de la venda de robe de casa, bèstie e anca un pìcolo peseto de tera.
