Quei che Savea ‘ndar Via
Barga, Toscana — otobre del 1889
Int´ la vila de San Piero in Campo, impiantà su le coste scure de la provìnsia de Lucca, ghe zera pì assenti che presenti. Quase ogni famèia gavea, o gavea gavù, un fiol, un fradèo, un pare che el zera ‘ndà via. La emigrassion, là, no zera ‘na aventura: zera rito, abitudine e eredità. I registri de la paròchia diseva che i primi òmeni de ‘sta zona i zera partì zà al scomìnsio del sécolo, verso la Fransa e la Suissa. Dopo, i ga scominsià a ‘ndar anca par l’Amèrica, ndove la tera la parea sensa fin e mai che ghe bastava brasso.
El Emilio Benedetti lu el ze cressesto ´nte ‘sto contesto. So nono el zera stà a Marséa, so pare l’avea passà quatro ani ´nte el Uruguay e u el zera tornà con un baule de monede e ‘na ferida bruta guarì su el piè manco. Da bòcia, el Emilio vedeva rivar le lètare con i francoboli colorà e le speranse piegà. Quache ‘na gavea drento un pò de schei; altre, le gavea inviti. Ma quasi tute le contava che el laor zera ‘na virtù granda — e che ‘ndar via zera roba da coraiosi, che no gavea paura de ricominsiar.
Lu avea ventun ani quando el se decise finalmente de partir. No el ze stà un pensier de un zorno, ma ‘na decision pensà pian pian, formà da le stòrie dei cusin che i zera a Campinas, inte l’interno de la provìnsia de San Paolo, e da ‘na busta con dtento trentamil réis mandà da un zio da parte de mama. El schei i zera zunto da ‘na lètara curta: disea che el Emilio el troverà laoro ´nte la fazenda São Gregório, ndove che ghe zera zà altri so parenti a piantar el cafè. E diseva anca che el se sbrigasé — che el contrato de parceria el zera quasi finì e che drento poco se lassarìa qualche posto.
Tuta la burocrasia el la ga passà con la stessa passiensa che i contadin i siapa l’inverno. El passaporto, con la copertina rossa, el lo ga domandà in comune. El paroco el ghe dà el certificà de condota. El sìndago el ga firmà con un "niente osta", che zera pì ùtile par i documenti che par la cossensa. El Emilio el ga pago la tassa da solo, sensa domandar a agenzie. No zera omo da improvisi. E come tanti emigranti de la Toscana campagnola, el no partiva con l’idea che l’Amèrica la fusse el paradiso — ma con la siguressa che la so vila no ghe dava pì posto.
In febraro del 1890, el ga montà su un treno verso Zénova, con ‘na sporta de tela greza, un cámbio de roba e ‘na cuciara de legno scolpì da so mama. ´Ntel porto, el se ga trovà con compagni de infánsia e sconussiuti che parlava in tanti modi. Ma tute i partiva con le stesse speranse: tera bona, laoro sicuro, e magari un ritorno con un poco de schei in scarsela. Quela zera la misura del sucesso.
La traversia e l’arivo — April del 1890
Su el vapor Re Umberto, el tempo el passava lento come ‘n fruston. Le setimane le se perdeva fra nèbia, mal de mar e atesa. El sotocoerta zera serà, l’ària màrcia, e i discorsi se rarefiava con la speransa che se mescolava con la fadiga. Ma el Emilio el tegnea duro. El si metè in un grupo de viaiadori, el spartì i vìveri sechi che l’aveva portà, el se lavava i piè ogni zorno con l’aqua freda, anca quando el ponte tremava con le onde. El saveva che star sano zera la prima vitòria.
El sbarcò a Santos al’alba, con i polmoni pien de mar e i òci che sercava tera ferma. La salita verso el planalto la se fè in vagoni de tersa classe, con el carbon e pien de famèie e sachi. A ogni fermada se vedea el Brasile: òmeni negri, putei scalsi, done coerte de polvere rossa. El Emilio el stava quieto e el guardava tuto.
A la stassion de Campinas, el vegnì ‘ncontrà da un parente lontan che el lo portò in fazenda São Gregório. Là el trovò quelo quel che el spetava: ‘na piantaion infinida de cafè, galponi con odor de paia bagnà e un capataz che misurava el valor dei òmeni con el peso dei sachi racolti. La òra la scomensiava avanti del sol e la finia solo quando el corpo no regiva pì. Ma ghe zera risoto su la tola, aqua ntei orci, e ogni tanto ‘na lètara che rivava da l’Itàlia e che ghe dava ancora un fià de passato.
El restar — 1898
El Emilio el lavorò oto ani sensa piantar. Pochi riposi, gnanca ‘na festa. El ze vivesto tra italiani, spagnoli e cabocli, el imparò a siapar cura de la tera, e a tegnerse ai regolamenti no scriti de la colónia. El zera, come tanti de la provìnsia de Lucca, sparagnador, preciso e tacon. El metea via ogni soldino e el scriveva a casa solo quando el podea mandar anca qualcosa.
Dopo el tempo, el comprò un peso de tera verso Jaguari, a do passi da São José dos Campos, ‘n posto con boscada e un rieto. No el ze tornà in Itàlia. Quando el gavea el modo e l’età par decider, el preferì meter radise in quela tera che ghe gavea dato pì de quel che la so vila ghe avessi mai podesto dar.
No el ze stà un eroe. Lu el ze stà un omo comun che savea sentir el momento de partir quando la vita ghe mostrava che l’emigrassion zera el seguir natural de la stòria de la so famèia. No el ze stà el primo. Noel ze stà l’ùltimo. E su i so quaderni consumà dal tempo, el scriveva:
"No son partì par scampar, ma par continuar el viaio che me pare e me nono lori i gavea zà scominsià. Èsser emigrante vol dir tegnerse a do mondi — e costruirse el pròprio teren in meso a lori."
Nota del Autor
Sta stòria la ze nassesta da la voia de dar ‘na vose a quei che i ze partì sensa rumor, sensa glòria e sensa tornar con onor — ma con la coraio quieta de chi che el capiva che emigrar, prima de tuto,zera ‘ndar vanti. Quei che savea ‘ndar via no conta de bravure né de destin fora del comun, ma de òmeni come Emilio Benedetti, che la so vita la se impasta con quea de mile altri che i ga traversà el mar in finì del Otossento, guiài da lètare, parenti lontan e ‘na siguransa profonda che restar no zera pì possìbile.
La stòria che se conta qua la ze ‘na fantasia che la vien fora da pesi veri: raconti de famèie toscane, registri de emigrassion, quaderni de memòria, lètare de parenti e tante stòrie contà da boca tra i dissendenti de chi che ga emigrà e vivesto su per le campagna del Brasil. Emilio el ze un personàio inventà, ma el so viaio el ze vero nel senso pì fondo — el fa rimbombar esperiense vive da tanti che i ga fato de l’assenssa un mestier, de la nostalgia ‘na règola, e del sconossù ‘na casa.
Sto libro el ze, dunque, ‘na reverensa discreta a quei che i ga partì con i piè su la tera e i òci ‘ndrà al orisonte. A quei che i ga savesto trasformar el gesto de ‘ndàr via in continuità. E a quei che, anca lontan da casa, no i ga mai desmentegà de ‘ndove che i vegniva.
Dr. Luiz C. B. Piazzetta
🇮🇹 Você é descendente de italianos? Siga este blog e compartilhe estas histórias. Cada leitura ajuda a preservar a memória, a cultura e o legado daqueles que tiveram a coragem de atravessar o Atlântico em busca de um novo futuro.
