Prete Pietro Colbacchini e la
Colónia Bela Vista ´ntel Paraná
El prete Pietro Colbacchini, el ze stà uno de i primi missionari que se ga formà dal Instituto Scalabriniano, in Itàlia. El ze nato a Bassan del Grappa, visin a Castéo de Godego, ´ntel ano 1845. Dai intorni de ‘ste do sità ze partì alcune famèie che i ga fondà la Colónia Bela Vista, situà a circa 14 chilometri da Imbituva, ´ntel stato de Paraná. La colónia la ze stà fondà ´ntel 1896 da emigranti italiani, lori i ze vegnù da la region del Véneto, in Itàlia.
"Sti emigranti, al scomìsio, i ze se sistemà in altre colónie intorno a Curitiba, e dopo lori i ga migrà verso la zona de Imbituva. Sta sità la ze situà a 177 chilometri da Curitiba e la ga ricevù emigranti alemani e italiani. La Colónia Bela Vista, ai tempi de la so fondassion, la ga un'area de 870 campi de tera fèrtile e la ze arivà a aver 400 abitanti. Sta colónia no la fasea parte de quele que stà fondà da i goerno de la provìnsia o da la nassion, la ze stà comprà da i emigranti stessi".
El prete Colbacchini, senssìbile al soferimento de i emigranti véneti ´ntel Paraná, el ga deciso de imigrar intel Brasil, dopo aver leto le lètare che el ricevea da i so antichi fedeli emigrà prima de lù, insieme al prete Angelo Cavalli, che el ze morto nel 1870. Riguardo a ‘ste lètare el ga dito: “Me ga strasià el cuor i lamenti che ghe zera in ‘ste lètare che contava del abandono in che i se ga trovà tanti disgrasià italiani e del perìcolo che lori i perdea la so fede.” El ze partì par el Brasil al scomìsio de novembre del 1884. Par prima el ze se sistemà a São Paulo e ´ntel 1886 el ze ndà verso el Paraná, dove già ghe zera la maioransa de le famèie che i zera partì da la so region nel Véneto. A Curitiba, el se ga fermà a la Colónia Dantas, che incòi la ze el quartiere de Água Verde. Par far el so laor pastorale, el gavea de spostarse a cavalo par distanse grandi tra le sità de Colombo, San José dos Pinhais, Campo Largo e Imbituva.
