Le Mèsse inte le Capèle del´Interno
de Barão de Cotegipe
In ogni comunità de Baron de Cotegipe ghe zera sempre na césa, na capèla, che la podéa èsser pì granda o pì pìcola, a seconda de quante faméie che ghe stava ´nte la zona. La capèla la ghe dava anca gestion al cimitero locale e a na cánsia de bòce, drio a qual, spesso, ghe podéa èsser un baretin, che’l andava i sabo de pomerìgio, la doménega e in certi posti anca i dì de fèsta.
Le cese le zera gestìe da ‘na diressiòn, formada dai residenti del posto, eleti par un ano, che i stava sempre in contato con la paròchia, che la gavea sede inte’l comune. Ogni ano, el prete el vigniva ogni tanto inte ‘na cesa, ndove che’l diseva messa al manco na olta l’ano, sempre nel dì del santo a chi che la césa la gera dedicà. El podea tornare anca in ocasiòn speciali, come batèsimi, crèsime, e quando zera a disposission, par la morte de qualche sòci.
De la doménega, quando el prete no vigniva, la comunità la fàva un incontro religioso, ndove uno dei residenti, de sòlito chi che ghe savea de pì de i riti catòlici, el "pregava la corona", cioè, el pregava la corona con tuti quei che ghe zera.
El dì avanti de la fèsta del paròn, la césa la gavea sempre pien de atività, ndove i sòci, tuti volontári, i lavorava par preparar el pranso che se servirìa el dì dopo. Questa atività finìa spesso de note.
La matina de la fèsta, i residenti i rivava co tanti mezi de trasporto, qualchidun anca da chilometri de distansa, e i ghe scominciava a trovare presso la césa. Qualchidun i ndava a visitar anca el cimitero, par visitar la tomba dei parenti morti. Dopo ‘sta vìsita, i se ciapava soto i àlberi grossi, aspetando che fusse rivà el prete. El vigniva da la sede del comune, dopo aver dito do messe in la cesa dea paròchia, drio ‘na vècia camionata Rurale Willys. De sòlito la messa inte le cese le zera segnàe par le undese e la finìa verso mezodì, quando che se faseva un gran pranso coletivo, la cui guadagno la zera par la paròchia e na altra par mantegner la capèla. El pranso de sòlito el zera un gran spèto, pagando ‘na ficha a la cassa de la capèla. La carne e i altri alimenti par preparar i piati i zera donà dai soci, e tuto el che se guadagnava andava par la ceseta e la paròchia.
Quando la camioneta de el prete se vedeva lontana sù per la strada, se scominciava a sonar el campanin del campanile, costruìo anca lu de legno come la capèla.
I fedeli i scominciava a ndare drento, omo e done separàe, sùbito al’entrata, fin che i ciapava el so posto.
In te, nel canto del'altar, ghe zera do àngeli grandi con i ale, che i tegniva ‘na candela cada un. Davanti ogni àngelo ghe zera ‘na fila de banchi. L’àngelo de sinistra zera de color blu, e quelo de destra de rosa. I omini e i tosatei i se sedeva davanti al àngelo blu, e le done e i putèi davanti al rosa. I banchi i zera venti, ma cambiava a seconda de la lunghessa de la capèla.
Sto costume interesante de separar omo e done par la messa se podeva ancora védare fin i ani ’90.
In quel periodo le messe le zera in portughese, e no pì in latìn, e durava circa ‘na ora, o qualchidun de pì a seconda del prete. Durante el sermon, se el prete el zera de origini taliane, o se i fedeli de ‘sta capèla i zera per la magior parte taliani, el podea parlar in talian, la lèngoa vèneto-brasilian, ‘na lèngoa creàda intel Rio Grande do Sul da i migranti. In altri posti el sermon el podea èsser anca in polaco, visto che sta etnia la zera presente in grande nùmero in Baròn de Cotegipe e anca in altri comuni vicini.
Ogni capèla la gavea el so coro, che ghe cantava co’l prete. I corali se sfidava con quei de altre comunità. Lori i zera sempre formà dai residenti, omo e done, reghidi da qualchidun che savea pì de mùsica. A volte ghe meteva un violin o pì spesso na fisarmónica.
Finìa la messa, tuti i ghe ndava drio ndove che se servirìa el spèto. Alora zera sempre fora, atorno a ‘na granda griglia. No ghe zera tole e sèda par tuti, cusì che ogni faméia se sistemava come che i podea, su la tèra, soto ai grandi àlbari, co’l spèto infilà drento l’erba. Come go dito, el spèto se comprava avanti de la messa e chi che lo comprava el ciapava ‘na ficha col nùmero del spèto. Le bevande se comprava al baretin drio la cànsia de bòce o in altro posto improvisà.
Dopo magnar, se sentiva i canti, che i amici improvissava, vedendo chi che cantea pì forte, quasi sempre con l'aiuto de qualchi bicer de vin. Le done se ciapava pì lontan de i omini par parlar e sentirse le novità de l’altre faméie.
