Le cure de ´na volta
A Medicina dos Imigrantes Italianos na Serra Gaúcha
"Crônica escrita em talian (a língua vêneto-brasileira)."
Nei primi ani del Novessento, su par i monti de le Colónie taliane quando la mata zera ancora pì granda dei campi e el mèdico rivava forse do o tre volte al mese, ogni capela gavea la so persona de fidansa. No la portava uniforme, no la gavea diploma e gnanca insegna sora la porta. Par tuti, la gera semplicemente la zia Caterina. Vedova da tanti ani, la vivea in una caseta de legno in meso ai filari di vite. Davanti casa la tegneva un orto che no servia solo par magnar. Là cresceva sàlvia, ruta, malva, camomila, artemisia, menta, tanaceto e tante altre erbe che la gavea imparà a doprar con la so mama, ancora in Vèneto, e che dopo l'ossean le gavea trovà tera bona anca ´ntela Serra. Se un puteo cascava dal caro, se un colono se taiava con la scure o se ´na dona vegnia ciapà dai dolori de partorir in piena note, no se mandava subito a ciamar el mèdico. Prima se mandea un puteo de corsa fin casa de la zia Caterina.
Lei rivava con la sporta de stropa, un rosàrio in scarsela e tanta tranquilità. Mentre le altre persone se disperava, ela disea poche parole, ma sempre giuste. Lavava le feride con aqua scotà, preparava impiastri de erbe pestade, fasciava con strassi de lino ben neti e pregava piano, come ghe gavea insegnà la so nona. Par la tosse la fasea ´na infusion de malva e miele. Par el mal de pansa ghe gera tisane de camomila e menta. Par le febri, impachi freschi e tanto riposo. Par i dolori de le done, infusi che olorava de montagna. E par ogni rimèdio la ripeteva che Dio gavea messo ´ntela natura tuto quel che servia, basta saver vardar.
El dentista? El zera a ore de cavalcadura. Par questo, quando un dente no dava pì pase, la zia Caterina se armava de coràio e, con l'aiuto de un omo robusto che tegnea fermo el malcapità, fasea quel che bisognava far. No zera un mestier che ghe piaseva, ma el dolor no speta mai.
Nissun parlava de pagamento. Qualchedun ghe portava un salame dopo la maialada. Altri un saco de formenton, do forme de formaio, una galina o un sesto de ova. Se ´na famèia no gavea gnente, la zia la soridea e la disea che el Sior ghe gavea zà pagà bastansa.
Le parturienti la volea sempre visin. Quante creature le ga vardà la prima luse de la lampada a petròlio con le man de quela dona! E quante volte la ze restà sveia fin al levar del sol, tornando dopo casa infangà, ma contenta de aver salvà ´na mama o un puteo.
Con passar dei ani rivò la strada, dopo el farmassista, dopo ancora el dotor fisso e finalmente l'ospedal. Le vècie cure pian pian le sparì, come sparisse tante robe de la coónia.
Ma chi ze nato in quei ani el sa ben che no zera solo le erbe che curava.
Zera la fidùssia.
Zera la solidarietà.
Zera quel mondo ndove ogni famèa gavea la porta verta par el visin.
E quando ancòi qualche vècio conta de le cure de ´na volta, no parla tanto de le infusioni o dei impiasti. El parla de persone come la zia Caterina, che sensa studi, sensa glòria e sensa pretese, la ga tegnesto vive intere comunità ´ntei tempi pì difìssili de la colonisassion italiana del Rio Grande del Sud.
Nota de l'Autor
Sta crónica la no conta la stòria de ´na persona precisa, ma la memòria de tante done che loro le ga vissesto tra le colónie taliane de la ¨Serra del Rio Grande del Sud" nei primi ani del Novecento. Passadi quasi sinquanta ani da quando i primi emigranti i ga sbarcà in Brasil, la vita la zera cambià, ma no tanto quanto se podarìa pensar.
Le foreste le zera stà in bona parte domà. Dove prima ghe zera solo grandi pini, cedri e imbuie, ormai se vardava vigne, granoturco, frumento e centinaia de case de legno. Le famèie gavea costruì capele, sale comunali, mulini, segherie e tante comunità che col tempo le saria diventà paesi importanti.
Ma el progresso el rivava pian.
Le strade zera ancora de tera, quasi impraticàbili con la piova. El cavalo e el caro restava i mezi principai par spostarse. El mèdico el viveva lontan e, in tante località, bisognava cavalcar ore intere montagne par poderlo ciamar. Le farmàsie zera poche e le medicine costava caro, robe che no tuti podea comperar.
Par questo motivo, ogni comunità la contava sora persone esperte: comare, curandeire, erbiste e done anziane che conservava un património de cognossense portà dal Veneto, dal Trentino e dal Friuli. Tante de quee cure le vegniva da sècoli de esperienza contadina e da una medicina popolare che univa osservassion, fede e tradission.
Naturalmente no tuti i rimedi zera eficasi secondo la medicina moderna. Qualchedun el fasea ben, altri servia pì a confortar che a guarir, e qualcun, visto con i oci de ancòi, podarìa perfino vegnir considerà rischioso. Ma bisogna giudicar quel mondo con i oci del so tempo. Quando no ghe gera alternative, la speransa e la solidarietà diventava parte dela cura.
Quela realtà la ga contribuì a formar el caratere de le colónie italiane. L'abitudine de dar ´na man al visin, de spartir quel poco che se gavea e de no lassarse mai soli davanti ala malatia la ze sta drio ´na de le sataron de la nostra cultura.
Sta crónica, dunque, la vol vegnir un omagio no solo a le "cure de na volta", ma soratuto a quele done semplìsse, quasi sempre desmentegade dai libri de stòria, che co le so man, la so fede e el so coràio le ga tegnesto vive tante famèie fin che el progresso rivasse anca tra le monte de la Serra Gaúcha.
Dr. Luiz Carlos B. Piazzetta
