I Imigranti Taliani ´ntei Cafesai del Brasil
Ghe ze stà un tempo in cui el profumo del cafè se smissiava con el suon de nove lèngue che rebombava par le vale e par le coline del Sudeste brasilian. Navi rivava carighe de speranse, mentre famèie inteire traversava l’ocean in serca de tera, de laoro e de futuro. Ntei cafezai del Brasil, stòrie de fadiga e de adatassion i ga formà destin e ga trasformà par sempre el paesagio umano del paese.
L’emigrasion taliana e l’espansion del cafè in Brasil
Tra le ùltime dessene del sècolo desdoto e le prime del sècolo vintèsimo, el Brasil el ga ricevu un gran nùmero de emigranti rivà da la penisola taliana. Se stima che, tra el 1870 e el 1920, sirca 1,4 milion de taliani si son sbarcai ´ntel paese — la gran parte mandà verso lo stato de San Paolo, che in quel tempo el zera el sentro de l’economia del cafè. Sto flusso el ze diventà ancora pì forte sopratuto dopo la abolission de la schiavitù ´ntel 1888, quando i paroni de tera i ga tacà a sercar lavoradori lìberi par tegner in piè l’espansion de le piantassion.
L’avansar de la coltura del cafè par l’interno paulista — sopratuto ´ntele zone conosude come Mogiana e Paulista, spinte da la fertilità de la ciamada “tera rossa” — domandava tanta man de òpera e continua. In sto contesto se ga consolidà el sistema del colonato, ´na forma de contrato rurale che smissiava salàrio e apartenensia. Diverso dal regime de la schiavitù, el colono talian firmava un contrato, de solito sùbito dopo rivar in fazenda. Ogni famèia la restava responsàbile par un certo numero de piante de cafè, ocupandose de la piantassion, de la netìssia del campo, de la racolta e del primo laor del gran.
La paga ´ntel colonato la zera formà da pagamenti proporsionai a la produssion, dal dirito de coltivar robe par magnar dintorno a casa — come formenton e fasoi — e dal uso de la casa fornida dal paron de la fazenda. Sto sistema el dava un poco de autonomia de produssion, ma el portava anca frequenti litigi par dèbiti, prezzi e tratignude, sopratuto ´ntei primi ani de adatassion.
La polìtica de imigrassion e la vita dei novi rivai
La politica de imigrassion del Brasil la gera stimolà tanto da interessi económici quanto da proieti de modernisassion e de ocupassion del territòrio. El governo provinsial e, dopo, quel republicano i ga sovensionà le bilieti e organisà la rivada dei foresti. Tanti dei novi rivai i ga passà par la vècia Hospedaria dei Imigranti del Brás, che ancò ze el Museu dela Imigrassion del Stato de San Paolo, ndove i vegnia registrai e mandai verso le fazende del interno. Raconti del tempo descrive lunghe spete, incertese e condissioni sanitàrie gnanca sempre bone, mostrando le prime dificoltà che tante famèie i ga dovesto enfrentar.
La vita ´ntele proprietà rurai la zera segnà da zornade longhe e da un laoro pesante, che comprendeva butar zo la mata, formar novi cafezai e tegner sempre in òrdine le piantassion. Malgrado le promesse de prosperità, tanti emigranti i ga trovà ´na realtà pì dura de quela che i se imaginava in Europa. Cussì e tuto, con el passar del tempo, ´na parte de ste famèie la ze riussida a meter via qualche soldo, comprar pìcoli tochi de tera o mudar verso laori de sità, partecipando anca al primo processo de industrialisassion paulista ´ntele prime desseni del sècolo vintèsimo.
Minas Gerais e Espírito Santo ´ntela stòria del cafè e de l’emigrassion
Anca se San Paolo el ga conssentrà el magior nùmero de emigranti e el ze diventà el sìmbolo de sto legame tra cafè e imigrassion, altre region cafeeire le ga ricevù laoradori taliani. In Minas Gerais, sopratuto ´ntela Zona da Mata e nel Sud del stato, el cafè el zera zà ´na atività ben consolidada dal sècolo desdoto, e la presensa taliana la ga contribuì ala transission gradual dal lavoro schiavo verso diverse forme de laoro lìbero, tra cui la partensia e el colonato. La dinàmica mineira la zera segnà da ´na gran diversità de sistemi agrari, smissiando grandi proprietà con unità familiari de produssion.
Intel Espírito Santo, l’esperiensa la ga ciapà caraterìstiche sue. L’emigrassion taliana la ze stada fortemente ligà a la formassion de nuclei coloniai e de pìcole proprietà agrìcole, ndove el laoro de la famèia el gavea un papel sentral. In ste zone, el cafè el ze diventà ´na base econòmica duradura, contribuindo par ocupar l’interno del stato e par consolidar l’agricoltura capixaba — ´na realtà che se vede ancora incò ´ntela forte identità cafeeira de lo stato.
Ste diferense regionai le mostra che l’emigrassion taliana no la ze stada un fenómeno tuto uguale. In certe zone el ga predominà el gran latifondio esportador; in altre, la pìcola produssion familiar la ga creà comunità stàbili e profondamente ligà a la tera. In comum ghe zera el laoro duro, l’adatassion a nove condission climàtiche e sossiai e lo sforso contìnuo par transformar la promessa de ´na vita mèio in ´na realtà vera.
Nota de l’Autor
Sto testo el ga come intento presentar, in maniera clara e documentà, ´na parte importante de la stòria de l’emigrassion taliana in Brasil: el laoro dei nostri antenati ´ntei cafesai del Sudeste brasilian tra la fin del sècolo desdoto e scomìssio del sècolo vinti. In quei ani, milioni de taliani i ga lassà le so tere de origine — sopratuto ´ntele region del Nord Itàlia — spentonà da la povertà, da la mancansa de tera e da le dificoltà económiche che segnava l’Europa rurale de quel tempo.
Quando i ga rivà in Brasil, tanti de lori vegniva mandai par laorar ´ntele grandi piantassion de cafè, sopratuto ´ntel stato de San Paolo, ma anca in region come Minas Gerais e Espírito Santo. Là, tra speranse e disilusion, i ga dovesto imparar a viver in un mondo novo, con clima diverso, lìngua diversa e abitudini che spesso pareva lontan da quele de la vècia pàtria.
El sistema del colonato, che organisava el laoro ´ntele fazende de cafè, el ga segnà profondamente la vita de tante famèie taliane. No zera un sistema fàssile: ghe zera fadiga, inssertese e, a volte, ingiustissie. Ma zera anca un spàssio ndove, con el tempo, tanti emigranti i ga trovà la possibilità de costruir un futuro, meter radise e formar nove comunità.
La presensa taliana ´ntei cafesai no la ga lassà solo ´na pestada económica. La ga contribuì anca a la formassion culturae e sossiae de diverse region del Brasil. Tradission, parole, modi de laorar la tera e valori familiari portai dai emigranti i ga aiutà a formar parte de la identità de tante comunità brasilian che ancora incò conserva memòria de le so origini.
Sta pàgina de stòria la merita vegnir ricordà no solo come raconto de sacrifìssio, ma anca come testimoniansa dela forsa, de la perseveransa e de la dignità de tante famèie che, lontan dala so pàtria, le ga trovà el coràio de ricominssiar.
Dr. Luiz Carlos B. Piazzetta
