La Vita de Domenico Dalmassen
Da le Langhe a la Montagna Gaùssa la traversia de un emigrante italiano
Domenico Dalmassen lu el zera nassesto ´nte l´ano 1891, ´nte el pìcolo comune de Prunetto, incrostà zo per le coline de le Langhe, ’ndove le vigne e i boschi se imbrassa come se i zera eterni. El zera cognossesto da la famèia e visin come “Menico”, soranome che la mare ghe gavea messo, parchè el zera nassesto picoleto e parea massa fràgile par resistar al peso de la vita. Ma, da bòcia, el ga dimostrà tuto el contràrio.
El passava i zorni a tegner le piégore sui prati sassorosi, acompagnà sol dal vento fredo che vegnìa zo dai Alpi e dal suon dei sinsieri sparpalià par la val. Quando el pare vegnìa zo in pianura a segar el formento, Domenico ghe ’ndava drio come un omo za càrigo de ´na vita intera. Intanto che i òmeni batea i grani con le masole e con i brassi indurì, lu el corea de ’na banda a l’altra, portando aqua mescolà con aceto par rinfrescar la gola a la compagnia. El pagamento zera de diese soldi al dì, quasi gnente, ma bastava par far sentir un putelo parte de un esèrcito de òmeni famà.
´Ntei mesi che el lavoro se raregiava su per le coline, lu e el pare scendea in pianura, passando de na famèia a l’altra, sempre a far i mestieri pì duri: bater grani, sistemar barili, alsar carichi. La magnada zera quatro fete de polenta in scarsela, el leto un monte de fien inte el fenil. Ghe zera zorni che tuto paréa na batàia sensa fin, na guera silensiosa contro la fame e la misèria, ’ndove el nemigo no se lassa mai venser.
Prima de vegnir omo fato, Domenico passò la frontiera e ’ndò a laorar in Frànsia. Ma l’ilusione de catar alìvio se scancelò sùbito: anca là, el sudor gavea el stesso gusto amaro, la fadiga el stesso peso de piombo.
Intanto, tre de so fradei gavea za traversà l’Atlàntico e se gavea sistemà in Mèrica, lavorando ´nte le segherie. Ghe zera lori che i ghe ga mandà danari par che el podesse ’ndar drio a incontrarghe. Int 1907, el se unì a un grupo de ventido compaisan e s’imbarcò verso el mondo novo. Prima de la partensa, le vacine che infiamava i brassi; dopo, l’imbarco su quel gran bastimento a vapor che odorava de fero, de mar e de paura.
La traversia zera na prova de resistensa. La magnada scarsa e de poca qualità, spartì in scudele come rassion de soldà. El ùltimo pian del navio la zo ’ndove Domenico el zera messo, el tegnea drento tresento òmeni, con e le done e bambin pìcoli in un altro compartimento visin. El mar, sbatù e crudele, pestava sul scafo; par do zorni el bastimento restò a la deriva, dominà da le onde che saltava sora el ponte la su. A ogni colpo de tempesta, la sensassion che la morte girasse par el compartimento se sparpagnava come ´na febre. Ma anca ’sta borasca, come tante altre, passò, e finalmente el bastimento ga varda le luse de Nova York.
El primo laoro de Domenico zera con un grupo che tegnea pì de sento òmeni vegnù pròprio da la so zona in Itàlia. El pagamento zera de sete lire e mesa par diese ore al zorno. La vita la gera segnà dal rumor sensa fin de la sega e dal cascar de le grande piante. El laoro consumea mùscoli e sudore, ma i taliani, malgrado la duresa, tegnea viva la fiama del grupo: el sabo sera, balo, carte, partide de balon e punho, e le notate diventava trègua contra la fadiga.
Par quatro ani Domenico restò in quel siclo de laoro e strachesa, vivendo in baraconi de legno improvisà, spartindo la misèria con òmeni che i zera diventà quase fradei. Tanti i ga restà. Lu, invese, decise de tornar indrio. La so vècia mare la zera sola e bastansa amalà a Prunetto, e el ricordo de lei pesava pì de ogni fortuna.
I tre altri fradei i ga restà in Mèrica, insieme con i altri ventun compagni che gavea partì con lori. Mai pì lori i ga mandà notìssie. El so silénsio zera un tàio profondo ´nte el cuor de Domenico, ma anca un segno che el destin, par ogni omo, se compie in maniera diversa. La traversia, la nostalgia e el ritorno segnarà la so vita par sempre.
De regresso in Itàlia, el ga vardato la mare malà fin a la fine. Do ani interi dedicà a vegilar noti silensiose, a portar aqua e legna, a sentir quei sospiri sordi che sol ´na mare solitària podea tirar fora. Quando lei la ga morì, a lo scomìnsio de 1909, la casa de piere a Prunetto la diventò solo na presion de memòrie. Domenico capiva che là no ghe zera pì futuro.
Poco dopo, rivò ´na lètera da Caxias, in Brasil. La zera de Pietro Bonelli, vècio visin de Prunetto, adesso paron de ´na famosa fàbrica de carosse ´nte la colónia taliana che fioriva ´nte el cuor del Rio Grande do Sul. Pietro el gavea bisogno de òmeni fidà e boni come marangon. Domenico, che quando ancora zòvene gavea imparà dal nono marangon da vila, l’arte de fabricar le rode e i assi de carosse e anca durante un perìodo prima de le segherie americane, el ga ricevesto sto invito come un segno del destin.
El viaio verso el Brasil zera longo e manco dramàtico che el primo, ma anca segnà dal compartimento la zo ´ntel fondo poco iluminà del navio , dal mal de mar e da l’ánsia de rivar. Quando el ga sbarcà ´nel Rio Grande do Sul, el ga trovà un mondo che odorava ancora de foresta taiada, ma che batea con l’energia de miliaia de coloni disposti a far vignai, case e fàbriche da la foresta.
A Caxias, Domenico se ga atacà ´nte la ufissina de Pietro come se questo el zera ´na parte naturale de la so vita. Le rode de le carrosse, che volea pressision par resistar al peso de le strade de baro e de piere, le diventò la so spessialità. I coloni savea riconosser el bon laoro, e presto el nome de Dalmassen el zera sinònimo de fidùssia.
Lì el ga conossesto Francesca Zardi, ´na zòvena vedova natural de Maser, in Véneto. El so marì el zera morto in un disastro brutìssimo, strucà da un caval durante el laoro su la tera che lori i coltivea. Francesca, ancora con la zoventù sul viso e mare de ´na putela ancora in bràssia ciamà Beatrice, se trovava davanti a un futuro dùbio. La tera che lei adesso gavea la zera massa pesà par le so forse, e za pensava de vender tuto e tornar a casa dai genitori in Itàlia.
El incontro el ga sussedesto quasi par caso. Domenico el zera stà ciamà a meter a posto le rode rote de ´na carossa, che scricolava sempre sora le strade de la colónia. La carossa zera de Francesca. El laoro lo portò su la pìcola proprietà, ’ndove el vide ´na dona bea tanto zóvena determinà a resistar, ma visibilmente straca. Fra le schege de legno e l’odor de fero scaldà, nasse ´na visinansa che se trasformò in destin.
I se ga sposà poco dopo. Francesca trovò in Domenico la fermesa che ghe serviva par no molar la tera, e lu, in lei, la famèia che ghe zera mancà par tanti ani. In quela casa sémplice, fata con fadiga e speranse, la vita de Domenico Dalmassen trovò radisi sòlide.
Da fiol picoleto de le coline piemontese, piegoraro e migrante erante, lu se ga trasformà in maestro de rode ´ntel cuor de Caxias, sìmbolo de ´na generassion che, tra osseani e adìi, la ga costruì un mondo novo.
Nota del Autor
Sta narativa la ze nassesta dal desiderio profondo de salvar la memòria de quei òmeni e done che i ga traversà osseani in serca de un destin che no ghe zera garantì in so paese. Mi go scielto Domenico Dalmassen come personaio sentral parchè la so strada la simbolisa la vita de miliaia de emigranti taliani che, tra la fine del XIX sècolo e lo scomìnsio del XX, i ga lassà le coline del Piemonte e de tante altre region de l’Itàlia par costruir, con sudor e sacrifìssio, na nova esistensa in Brasil.
La stòria de Domenico no vol esser la riprodussion precisa de un individuo spessìfico, ma na ricostrussion literària inspirà ´ntele lètare, testimoni e registri che i ze rivà, testimoniando i dolori de la partensa, i perìcoli de la traversia e la duresa de l’adatarse. Cambiando nomi, posti e detài, mi go sercà de tegner amparà l’identità dei personagi stòrici e, ´nte el stesso tempo, dar vita a un protagonista che incarna la forsa coletiva de l’emigrassion taliana.
Mi go scrito sta stòria par dar vose a chi che quasi mai podea scriver la so pròpia version de la vita. El ze un tributo a chi che perde tuto e comunque sémena speransa, a chi che trovò in Brasil ´na casa lontan e, sora de tuto, a chi che capì che emigrar vol dir viver sempre tra do mondi: quel del ricordo e quel de la costrussion.
Dr. Luiz C. B. Piazzetta
