Mons. Scalabrini e ´Imigranti ´Italiani ´ntel Brasil
Giovanni Battista Scalabrini l’è stà vescovo de la sità de Piasensa e fondador de le Congregassion de i Missionari de San Carlo e de le Sorele Missionàrie de San Carlo. El ze nato l’8 de lùlio de 1839 inte la sità de Como, Itàlia. A 18 ani el ze intrà inte’l seminàrio e el ze stà ordenà prete inte’l 1863. El ze stà consacrà vescovo inte’l 1876.
El gavea na gran sensibilità par el drama che viveva le famèie che emigrava, e cussì el se ga avisinà a chi che partiva da l’Itàlia. Sta sensibilità la se gà sveià vardando i emigranti che aspetava el treno par el Porto de Zénoa, da dove i se imbarcava par l’Amèrica.
Na volta el gà contà su i emigranti: "Lori i zera bagnài de làgrime, lori i gavea a dir adìo ai so paesi, ndove i zera nassù e ndove i gavea tanti bei ricordi. Ma, con coràio, i zera pronti a lassar la pàtria ndove i gavea conossùo solo l’odioso servìsio militare e el riscuador de le tasse."
El credea che zera compito de la Cesa intervenir su’l Stado par dar aiùto a ste persone. Inte la so lètara pastorale a la diòcesi de Piasensa, ´nte’l 1882, el dissea zà che "bisognava entrar inte la vita pùblica, doparando tute le strade lècite par el trionfo de la verità e de la justìssia."
Inte’l 1891, inte n’altra lètara pastorale, el scrivea: "Dovemo vegnir fora dal tèmpio se volemo esercitar na assion salutare al so interno." Par catare risposte al sofegamento de i emigranti, el ga fato alcune proposte de lege su l’emigrassion e inte’l 1887 el ga fondà la Congregassion de i Missionàri de San Carlo. El ga fondà la Società San Rafaele, un movimento laico par servir i emigranti. El gà fondà anca la Congregassion de le Sorele Missionarie de San Carlo ´nte’l 1895, e ´nte’l 1900 el ga dato el riconoscimento diocesano a le Sorele Apòstole del Sagrado Core, mandandole a laorar con i emigranti italiani ´nte’l Brasil.
A 62 ani, par conòsser de visin la situassion de i emigranti italiani e par consolidar le òpere che gavea inissià, el ga visità i Stati Unii, el Brasil e l’Argentina, tra’l 1901 e el 1904.
Mons. Scalabrini el ze morto el 1 de zugno de 1905 e par tuto el so laoro, el 9 de novembre de 1997, el ze stà beatificà dal Papa Zuan Paolo II.
