L’Imbarco de i Migranti
Ntei ùltimi ani del sècolo XIX, l’imbarco dei emigranti taliani ´ntel porto de Zénoa se disegnava come una scena de grande emossion, piena de simbolismo e caos. El movimento contìnuo del porto se trasformava in un senàrio de despedida, ndove la speransa e la disperassion se mescolava. El gran vapor, ancorà a le doche, aspetava in silénsio ma imponente, sugando un flusso contìnuo de persone. Famèie intere, campagnòi, operai e zoveni in serca de oportunità nove ndava avanti in un corteo interminà, ognun portea no solo le valisi, ma anca i sòni e i temori de na vita nova. Tanti i ga passà la note per strada, sensa soldi par pagar un albergo, e son rivà al porto strachi, afamà e segnà da tante ore de viàio in tren.
El senàrio el zera un disordine totale. Òmeni cargava careghe pieghevoli, valise de carton, sachi de tela consumà, materassi e coerte su le spale. Done, tante con putèi in brasso e fiòi pìcoli a fianco, equilibriava pachi pesanti mentre ndava avanti. Vècie campagnole, vestide de robe semplice e con zocòi de legno, tirava sù le gone par no impissiarse su la streta passarela sospesa. Qualchedun i zera scalzo, con i scarpi pendolà al colo, par risparmiarli par quando i ga rivà ´ntel mondo novo. El porto se empiniva de i dialeti de tuta Itàlia, creando un mosaico de vosi che rifletea la diversità de chi partìa.
In meso a la multitude, i fiòi pìcoli, serti anca con le etichete del´asilo atacà ale robe, tegnea ben streta la man de i so tutori. Mame cantava nénie par calmar i sui puteleti, mentre i papà tentava de mascherar l’ansietà, ma i oci lori contava un mar de incertese. L’imbarco el zera un desafio emossional: tante famèie vegnia spartìe quando se entrava sul vapor. Done e fiòi vegnia mandà in aloggi separà de i omeni, e la dolor de sta separassion se podéa sentir viva. Le done, con passi inserti, scendeva le scale rìpide verso dormitori fredi e strapieni de letàri, come scafali de un magasen. Quei spassi, gèlidi e disumani, i zera un riflesso de le dificoltà che gheva da rivar.
El rumore del porto i zera assordante. Oltre al movimento de le persone, rimbombava el rugnì de le machine del vapor, i urli de i lavoradori e el fracasso de le grue che cargava bauli e cassoni. Anca i versi dei animai che vegnìa imbarcà, come bovi, pecore e anca cavài, se mescolava con el disordine, creando un caos interminà. In meso a ‘sta massa de pòveri emigranti, passava i passegeri de classe alta, con robe eleganti e valisi legeri, i visi indiferenti contrastava con quei de lavoradori sporchi e strachi, che avea vendù tuto par pagar el bilieto.
El registro de i passegeri sussedea a l’entrada del vapor, dove un ofissial li agrupava in grupeti, chiamà "ranci", de sei persone, incaricà de spartirse le vivande durante el viàio. Spesso, famèie pì pìcole dovea mescolarse con sconossui, generando sfidùssia e tension. El timor de vegnir imbroià i zera evidente, specialmente quando un ofissial con el penel e un quaderno de registri compariva, fassendo nàsser la paura che qualcosa se perdesse, spèsie i desconti par i fiòi. Nassea discussioni e protesti, ma i zera sùito sofocà da la pressa da l’autorità del barco.
Quando i emigranti montava sul vapor, ‘sto parea una creatura colossale, ferma ma famèlica, che i sugava no solo i corpi, ma anca i sentimenti, le memòrie e i sòni de sentinai de persone. La despedida sul molo i zera segnà da làgreme e gridi. Tanti savéa che no tornarìa mai pì ´ntele so tere natal, mentre chi restava sentia el peso de la separassion, conssapevoli che podéa èsser l’ùltimo adio. Par tanti, l’imbarco a Zénoa rapresentava la fine de na vita de privassion e l’inìsio de na aventura piena de inssertese. Ogni passo verso el vapor i zera un salto ´ntel sconossuo, ma anca un tentativo disperato de trovar qualcosa de mèio.
