´Ntel passà, el maridarse no el zera 'na scelta fata con el sentimento, ma 'na necessità pràtica par garantir la soravivensa. Par tanti ani, l’ùnico modo par 'na dona de tegner 'na casa sicura, da magnar e 'na qualche protession la zera el matrimónio. L'idea che 'na dona podesse laorar, tegner ´na proprietà o semplicemente aver diriti legai el zera impensàbile.
La so vita girava tuto intorno a la tutela mascolina: prima proteta dal pare e, dopo, dal marito. Chi no se sposava gavea vita dura. Tante resteva a casa con i genitori fin che podea, e, quando no zera pì possìbile, vegniva mandade da parenti con pì mesi o confinà ´ntei conventi – speso no par vocasion religiosa, ma par mancansa de alternative.
L’amor no el zera importante in sto contesto. El matrimónio el zera 'na istitussion social e económica, e poche olte ligà ai sentimenti. L’amor zera roba da poesie e stòrie, ma, in realtà, le donele zera preparade par far le spose sotomesse e le mare premurose, sensa spasso par ideie o desideri propri.
La vera trasformassion la ze rivada con la Rivolusion Industrial. Ze sta in sto perìodo che qualcuna la ga scominsià a laorar fora de casa, gavendo ´na so renda, e conquistando un po’ de indipendensa económica. Cussì loro le ga podesto, par la prima volta, viver sensa depender totalmente da un omo e anca rifiutar matrimoni combinà.
Ogni dirito che le done le ga conquistà ze sta fruto de lote intesse, sacrifìssi personai e tanta coraio. Cognosser sta stòria no serve solo par valorar el passà, ma par proteser le conquiste de incòi.
La libartà no ze mia un regalo – la ze un lassà che se costruì con el sforso.
Nota de l'Autor
La stòria che se presenta qua ze pì che un raconto de viai e sfide; la ze 'na celebrassion del rolo vital che le done ga avudo ´ntel perìodo de l’emigrasion italiana. Lontan dai rifletori de le narative tradisionai, ste done le ga portà su le spale e sul cuor el peso de le famèie, de la tera e de la cultura.
Mentre i marì e i fiòi i combatea ntei campi duri e ´ntei dificoltà de la vita, le done zera le custodi de le tradission e de la lèngua madre. Ze sta in cusina, in cortil, ´ntei canti par far adormensar i fiòi e ´nte le preghiere de le note che la lèngoa véneta la ga trovà riparo, ecoando da ´na generassion a l'altra. Lore le ga salvà i savèr antichi e cusì con coraio e dedision l’identità de le comunità.
La forsa de ste done no la zera solo ´ntel soportar le durese del quotidian, ma anca ´ntel vardar avanti. Transmetendo valori, stòrie e usanse ai fiòi, le ga plasmà el caràter de le famèie e ga garantì che l’eredità cultural véneta la restasse viva e vibrante, anca in tere lontan come el Brasile.
Sta narativa, parte del libro Vose Silensiose: La Lota de le Done ´ntel Passà, la ze un omaio a lore – le mare, le fiole e le none – che, con le man ruvinà e el cuor curaioso, le ga trasformà sacrifìssio in eredità e sfida in stòria. Che le so vose resta sempre come fondamentai ´ntel construir un ponte tra el passà e el futuro, tra l’Itàlia e el Novo Mondo.
Dr. Luiz C. B. Piazzetta
