El Filò

 

El Filò

I filó, tìpici de le comunità rurai de i migranti taliani ´ntel Rio Grande do Sul, i zera eventi che i fasea molto pì che solo incontri. Intei primi ani de la colonisassion, a la fin del sècolo XIX, i zera pien de simbolismo culturai e i zera de grande importansa pràtica e emossionai par la vita de i coloni.

Questi incontri loro i sussedeva de solito ´nte le sere frede e calme de la zona coloniale italiana gaùssa, drento de case simplisi, fate de legno o de piera, che le mostrava povertà ma anche calor umano. La casa la zera iluminà con i ciareti, pìcole lampioni a oio, e la caldura la vigneva dal fogon a legna, intorno al qual le persone i se radunava. Anche se le famèìe i zera distanti una da l’altra, la vòia de ciacolar, rider e portarse conforto la fasea superar la stanchesa del camin fin a la casa s-ielta. Zera na pausa dal solitàrio, na maniera de ritrovar la comunità e selebrar la vita, anche in meso ai dificoltà.

El filó el zera un mosaico de sóni, sapori e gesti che el costruiva l’identità culturai de i migranti. Strumenti come violoni, filarmóniche o flauti rudimentari, fati a man, i portava mùsica par tuti. Le cansoni taliane, cariche de nostalgia e speransa, lori i ressonava drento la casa, riportando al ricordo de la tera madre e raforsando el senso de apartenensa.

No mancava le stòrie contà dai pì vèci: legende taliane, raconti de braura o de le dificoltà che lori i zera pasà sia in Itàlia che in Brasil. Le stòrie no le zera solo par far passar el tempo, ma zera anca par mantegner viva la cultura e trasmeter valori ai pì zòvani.

Intanto che i parlava, le man no le stava mai ferme. Fare laor come intressar paglia per far la trèssa, filar lana, cusir o scortigar panòci i zera normai durante el filò. El laor in comun el portava un senso de unione e el rendeva le fadighe pì lesiere.

La spartission del magnar el zera uno de i momenti pì bei. Poenta calda, pan fato in casa, formai, salame e vin de casa i zera spartìi tra tuti. Ste robe, fate con el laor de ogni dì, i simbolizava solidarietà e gratitudine.

Spesso, el filó el finiva con le danse tipiche che le portava alegria a le sere. I giri veloci e i bal veloci i rompeva la rutina pesante, riempiendo l’ària de risi e armonia.

Pì che solo recreassion, el filò el zera un momento de sfogo emossional par i coloni. El zera un spasso ndove la nostalgia de l’Itàlia la trovava conforto e ndove i sòni de un futuro pròspero in Brasil i se costruiva pian pian. El filò el raforsava i legami comunitari e el dava forsa par enfrentar el isolamento, creando una rete de sostegno indispensabile.

Ste tradission, con la so semplicità e profondità, le ga segnà la identità de le colónie taliane ´ntel Rio Grande do Sul. L’eredità de i filó, viva ancora, la se selebra ´ntele feste e ´ntele tradission, perpetuando la memòria de i pionieri e de la so forsa davanti a le adversità.