Lìnea Palmeiro:
El Stradon dei Emigranti Taliani tra Bento Gonçalves e Farroupilha nel RS
Par i primi ani de la colonizassion taliana sora el pianalto de la Serra Gaúcha, le famèie le ze stà piasàe su grande loti de tèra spartìi da strade, stradon e pìcoli camini, che lori i gavea fato par permetar el passàgio par tuti. Da quelo princìpio, s’era capio ben che servia de strade bone par che i coloni lori i podesse portar fora i so prodoti e venderli ne le sità.
La ciamada “Linha Palmeiro”, cussì batisà par onorar l’ingegnier che l’avea segnà i loti, la ze stà ´na de le prime strade coloniali del Rio Grande do Sul. La sbrissava par 28 chilometri e par tuto el trageto ghe zera ben 200 loti de tera, che sùito i ze stà ocupài da emigranti veneti che i rivava. Sta stradona la tacava a na contrada ciamà “Barracão”, nte la Colônia Dona Isabel, incòi Bento Gonçalves, là ndove stava el primo loto, e la rivava fin a la Colònia Nova Vicenza, incòi Farroupilha, dove se trovava el loto de nùmaro 200.
Lungo sto percorso, un censimento fata ntel ano 1883 el contava che tuti i loti i zera zà ocupài, anca con pì de na famèia, parché ogni loto el zera pì grando. Sempre secondo quel censimento el contava che ghe stava 1938 cristiani che i vivea lungo sta stradona. La Lìnea Palmeiro, par la so importànssia, la ze stà palco de stòrie grande de la colonisassion vèneta sora queste tere. Tra queste, ghe ze la morte de Don Doménego Munari, pàroco de quei pionieri, morto ntel 1878, con ghe gavea solo 39 ani, nte l’altesa del loto 79.
Don Doménego, lu el ze stà pàroco de Fastro, ntel comune de Arsiè, nte la Provìnssia de Belùn, e el ze emigrà par el Brasil nel 1876, passando par Porto de Bordeaux, con un gran grupo de i so parochiani, par far ‘un viàio acidentà sora un veliero norvegese che lo gà ciapà na mala sventura par mar, quasi al largo de la Frància. Anca sora sta stradona de la Lìnea Palmeiro la ze nata la Capela de la Madonna de Caravaggio, nte el loto 139, incòi Santuàrio, che la gà segnà la vita de quela populassion.
