"La vita la ze ´na sola e bisogna sercar de viverla a pieno"
Capìtolo 2
La pìcola depresión, come un refùgio naturale, ghe dava un riparo precàrio ma presioso ´nte l'immensità de la note. Acocolà visin al gran sasso, i so vestiti ancora bagnai no i zera compagni gentili, ma la nesesità de nasconderse la superava el malèssere persistente. ´Ntel silensio puntegià solo dai sospiri del vento, el contemplava le stele che, testarde, le fendeva le nuvoe scure, disegnando mape selesti ndove el sercava orientamento par la so fuga. La strachitúdine impregnava ogni fibra del so èssere e el stómego protestava silensiosamente par la mancansa de magnar. El dilema de no podar assender un fogo par asciugar i vestiti e placar la fame lo lassava a la mercè de i elementi implacàbili. Tutavia, l'imprudensa de rivelarse a la luse de le fiame la zera un risco che no osava còrer. Inte l'isolamento de la note, el zera un esilià tra le ombre, un contorno indistinto ´ntel paesagio noturno. L'eco lontan dei rami che se spesava soto le zampe àgili e i ringhi lontani risuonava ´ntela so mente, mantenendolo costantemente in alerta. I so sensi, afilài dal'urgensa de la fuga, i coglieva ogni sospiro de la note, sperando de distinguer tra i soni naturai e i segnai de la persecusion. Soto la freda pietra e l'oscurità vorace, el se abandonava a un sònio inquieto, ndove i sòni i zera invasi da fugasi ombre e abai imaginari. La note la passava lenta e spietada, ma lu, nonostante el malèssere e l'ignoto, abrassiava la furtiva speransa che sussurava in ogni stela del firmamento.
Esaurìo, el sedete al peso de la stranchesa, lassandose trasportar in un sònio tumultuoso e inquieto, ndove i incubi i dansava ´ntela so mente come ombre inquietanti. A ogni risvèio improviso, el batito asselerà ghe riechegiava la paranòia de un iminente patugliamento nemico. Ntei recessi dei so sòni, come bagliori fugaci, scorevano scene de la so vita, dai primi passi come agente secreto fin a la preparassion meticolosa par la fuga. Tra ste vision, el zorno fatale de la so catura e la longa permanenza ´nte el covo improvisà el emergeva con agitassion, come fantasmi del passato inssessantemente presenti. L'oscurità de la note la sedeva el passo a un'alba che, ancora tìmida, la rivelava la promessa de un novo zorno. Anche se la piova insistente la zera cessà, el so viàio continuava soto la penombra matutina. Movendose con freta, ora corendo, ora schivando i ostàcoli ´nte la foresta de abeti interminàbile, el intravedeva la radura che se estendeva davanti a lu. Con el sòrgere del sole, el teren se rivelava pì àmpio, adornà de cespuli selvadeghi ndove pendeva fruti de un rosso scuro. Avicinandose, i osei i prendeva el volo, complissi ´ntela condivision de quel bancheto naturale. Inspirà dal ingegno de la natura, el se permitete de assaporar alcuni de quei fruti, sentendo un benèssere momentáneo infiltrarse ´ntei so sensi. Consapevole de la nessessità de protegerse da l’umidità persistente par evitar un'infesión pulmonar, el avansò con determinassion, nutrindose no solo dei fruti ma anche de la speranza resiliente che, come un fràgile germòlio, continuava a fiorir intel meso de la so odissèa.
Quando finalmente el sole el se degnò de comparir, el fugitivo rivalutò la so posission, agiustando astutamente el so percorso. Sodisfà, el se rese conto che no ghe voleva grandi coressión. Int l'oscurità de la note passà, anche soto i colpi del tempo implacàbile, el ga tenù fermo la bùssola de la so diressión. Inte un silensioso ringrasiamento ai maestri del passà, omagiando i zorni de duro adestramento ´nte le profondità de la foresta, el sorise interiormente. Calculò mentalmente la vastità dei chilometri lassià a le spale da la fuga desperà a l'alba. I pìcoli fruti aspri, consumài ´ntei momenti de bisogno, i zera diventài el bàlsamo rivitalisante che ghe restituiva le forse, portandolo, secondo la so valutassion, al stato de robustesa desiderà. Quando el sole el se trovava al cùlmine, proietando ombre mìnime su la tera selvadega, el se spogliò dei so vestiti bagnai in na pìcola radura. Con la paciensa del stratega, el i stese su una pietra, lassandoli al sole par assiugar. La temuda patuglia, che ´nte le ombre del passato la pareva un spetro a inseguirlo, la se rivelò incapasse de rintrassiar i so passi, come se la stessa natura la conspirasse a so favore. O forse i se zera arresi a la càssia. Dopo un par de ore, durante le quali el se conssedete un breve riposo, el racolse i so vestiti adesso quasi completamente assiugai. Aprovessiò la pausa par racoglier pì de quei fruti selvadeghi, fidati aleati ´ntel so viàio solitàrio.
Con la serietà de chi prevede le sfide che el crepuscolo el porterà, el riprese la marcha. La mente la stava zà progetando la possibilità de costruir un refùgio, un riparo contro le inclemense de la note iminente. Le so prevision indicava un gelo crudele o forse i caprissi de ´na tempesta de neve su le alture, ndove l’altitùdine de oltre 1200 metri la conferiva al clima cambiamenti repentini e imprevedìbili. Nel cuor de la natura selvàdega, ndove l'imprevisto el ze l'ùnica costante, lu persisteva, un intrèpido viaiatore ´ntele rede del destino implacàbile.
