L'Emigrassion Vèneta un´ Ato de Rebelion.

 

L'Emigrassion Vèneta un´ 

Ato de Rebelion

L'emigrassion vèneta, specialmente da la metà de el XIX sècolo in poi, la se pò capir come na forma de protesta silenssiosa, ma potente, contro le ingiustìssie sossiali, economiche e politiche che i ga tormentà ‘sta region par sècoli. Par capir ben sto fenòmeno, bisogna mètar rento la so stòria de el pòpolo vèneto, che el se ga desfà dopo el rebalton de la Serenìssima Repùblica de Venèssia, un Stato che, par quasi mile ani, gavea garantìo na certa stabilità e prosperità al so pòpolo.

Con l´invason de Napoleon ntel 1796 e la conseguente anession de el Vèneto al´ Impero de l´Austria, la vita dei vèneti la ga scominsiar a cambiar in modo dràstico. L'antica serenità de la Repùblica Venessiana la ze stà sostituìta da la rigidesa e austerità de el domìnio austrìaco, che, anca lu ne garantiva na certa sicuressa, no el gavea pi la capacità de fornire la stessa qualità de vita. La frase popolar "Con la Serenìssima se magnava a mesodì e a la sera; con Cesco Bepi se magnava solo a mesodì ma, con i Savoia, né a mesodì e ne gnanca a la sera" la descrive ben la persession de un pòpolo che i gavea vardado la so situassion de vita deventar desolante.

Con l'unificassion de l'Itàlia soto la Casa de Savoia, la vita par i vèneti la ze deventà ancora pi tràgica. La degradassion econòmica, che lori i sentia soto el domìnio austrìaco, la ze stà aumentada da le guerre, de le nove tasse e de l'instabilità polìtica de el neo-nato Regno d'Itàlia. I pìcoli contadini, che da generassioni i ga vivesto come mesadri o ancora paroni de pìcoli tereni, lori i se ga trovà sempre pi schiacià tra le tasse alte e la necessità de vendere le so tere par sopravivere.

L'emigrassion, in sto contesto, la ze nassesta come na risposta naturai, quasi inevitabile, par tanti vèneti. Stimolà da qualche autorità e spesso anca dai sermoni de doménega de i preti in cesa, che i vedeva ´nte l'emigrassion na maniera de evitar un conflito armà, sta fuga in massa no la ze stà solo na ricerca de migliori condission de vita. La ze stà, sopratuto, un ato de resistensa passiva contro i "paroni de tera" che i gavea "sfrutà" sti lavoratori par tanto tempo. L'espression "Tasi sempre, obedire sempre", che la gavea caracterisà el raporto di vèneti con i so paroni e anca con la cesa, la ga scominsià a perder la forsa, a man a man che sti contadini i dessidea, in gran numeri, de sercar na nova vita in tere lontane, specialmente ´ntel´ Amèrica.

Sto ésodo in massa el ze stà un colpo par la vècia ordine sossial. De repente, quei che i gavea tegnù el potere e el control sui laoradori de i campi, adesso lori i se ga trovà sensa mandòpera par laorar le so tere. In un colpo de destin irònico, tanti de i vèci proprietàri de tera, che prima i gavea lori el poder, lori oromai i ze stà costreti a sporcarsi le man con el laoro duro, parché i no gavea pi chi lo faséa par lori.

Cussì, l'emigrassion vèneta la se po veder come na forma de protesta contro l'opression e lo sfrutamento, na maniera par dire "basta" a na situassion che gavea deventà insostenibile. La ze stà un movimento spinto dal desidèrio de na vita mèio, ma anca da un sentimento profondo de rebelion e no conformità con na realtà che gavea deventà intolerabile. Par i vèneti, emigrar no ze mai stà solo na scielta econòmica; la ze stà un ato de dignità e de resistensa, na maniera par reclamar el dirito de viver con dignità, anca se questo volea dir lassar indrìo la tera dei so vèci e ´ndar a cercar novi orizonti in posti lontani e sconossiuti.